Nkosilathi Sibanda
AMAQEMBU azitshaya isifuba ngokuthi yiwo amadala kulamanye kunguqu yeCastle Lager, iHighlanders leDynamos, ayangqikilana kulimpelaviki.
Zidibana enkundleni yeRufaro ngeSonto.
Lo ngumdlalo okungabuzwa muntu ngokuqakatheka kwawo kuligi ephakemeyo, kubadlali lakubasekeli ngoba uhlezi uphethwe emlonyeni.
Zombili zavula isizini yalonyaka kumdlalo wazo owabakhona mhlaka 10 Mbimbitho eBarbourfields Stadium. I-Highlanders yanqoba 2-1, kwajabula idolobho lonke lakoBulawayo njalo kwabangumsebenzi omuhle kumqeqetshi uKelvin Kaindu owayengakaze anqobe iDynamos ngesikhathi eqeqetsha iTshilamoya.
Kulowo mdlalo kwavutha uMelikhaya Ncube, owayechinsa ukugqoka ezimnyama lezimhlophe ngalelo langa. UNcube wagaxa elakuqala emambuleni ngomzuzu wesi-19, ethole ibhola elalivela kungcitshi yokureyitsha uMcKinnon Mushore.
Umdlali wasesiswini u-Archford Faira wahlohla elesibili ngomzuzu wesi-49, kwathi iDeMbare yona yathi “khwetshe” elalo ngomzuzu wesi-60, kungu-Emmanuel Mandinyenya.
Loba iHighlanders yathola imiklomelo yonke, lo sekungumdlalo osemandulo ngakho ukuqala kakutsha ngeSonto, lokukhohlwa kancane kungabangcono.
Ngesikhathi kuvulwa isigaba sesibili seligi ngempelaviki, kuzwakala ukuthi akumanga kuhle kumaqembu womabili. IDynamos yehluleke ukuqhuba inhlelo zayo zokuqeqetsha kuliviki ngoba abadlali bekhala ngemali.
Umqeqetshi wayo uGenesisi Mangombe kubikwa usetshitshe waze wahawula ethola kungelamuntu enkundleni yokulolonga.
Umgcinisihlalo weqembu uMoses Maunganidze uze wavuma ukuthi kugonqamile eqenjini lakhe.
“Okwakuqala ludaba lwemali yabadlali eyasalayo eye-signing-on fees lamabhonasi angabhadalwanga.
“Sizama konke ekuthini ngesikhathi sidlala leBosso, umumo uzabe usuphenduke kwelingcono ngoba kumele sinqobe,” kutsho umgcinisihlalo lo.
Omunye wabadlali beDynamos okhulume lequla leZimpapers Sports Hub uthe: “Sesitshelwe amanga amanengi kakhulu. Sekwanele.”
Kusenjalo, iHighlanders leDynamos kaziveli egcekeni ngenyathelo lokuthenga abadlali kulinyanga. Imbiko ephumayo kayijuli kakhulu njalo kukhanya abaphathi bamaqembu bawomele ezikhwameni, ikakhulu enkambeni yeHighlanders.
Kumidlalo yayo kusigaba sakuqala sesizini, iHighlanders ibixega phambili lasesiswini senkundla, obekusenza kubenzima ukuthi ihlohle loba ibithola amathuba.
Kanenginengi umqeqetshi uKaindu useyikhulume waze wadela ukuthi udingwa ukuncediswa ukuthenga abadlali abahlohlayo. Kumalanga asanda kwedlula, iqembu leli kubikwa ukuthi ligijimisana loNever Rauzhi umdlali weBulawayo Chiefs.
Lokhu kuzakuba ngokwesibili iBosso izama ukudonsa umdlalo weChiefs, kulandela ukwehluleka kwayo ukuthenga u-Obriel Chirinda ngesizini edluleyo.
Njengoba ifasitela lokuthenga lokuthengiswa kwabadlali lisavuliwe, kuzalindwa ukuthi kubonakele ukuzimisela kwenkokheli ekuthini ziqinise amaqembu azo.
Imidlalo yeCastle Lager ngeviki lesi-18:
NgoMgqibelo: Bikita Minerals vs Herentals College (Sakubva), Ngezi Platinum Stars vs Arenel Movers (Baobab), Simba Bhora vs Manica Diamonds (Wadzanayi), Bulawayo Chiefs vs Green Fuel (Luveve), Yadah FC vs Hwange (Heart Stadium)
NgeSonto: Chicken Inn vs Caps United (Luveve), Chegutu Pirates vs FC Platinum (Baobab), TelOne FC vs ZPC Kariba (Bata Stadium), Dynamos vs Highlanders (Rufaro)
