Zibhaxabulwe zachuma Indlovukazi

11 May, 2023 - 00:05 0 Views
Zibhaxabulwe zachuma Indlovukazi Indlovukazi Queen Lozikeyi Academy

uMthunywa

Nkosilathi Sibanda
KUBE lilanga eliqalise ngenjabulo laphetha ngenyembezi kuqembu labesifazane kumdlalo wenguqu eleQueen Lozikeyi Academy kulandela ukunqotshwa kwalo 5-0 yiBlack Mambas.

IQueen Lozikeyi liqembu lakoBulawayo eliku-Women’s Super League elithethe indawo yabodade beBulawayo Chief abazibiza ngokuthi ngamaKhosikazi.

Amakhosikazi zintshantshu zeligi ekumhlubulo ongezansi yelizwe kodwa lehluleke ukuphumelela ukudlala kuligi ephakemeyo ngenxa yezizatho ezithile, ezibalisela ukuswela imali. Ngokunjalo, inkokheli zaleliqembu zabopha iqhinga lokuhlangana leqembu leMatabeleland Select ngokuvumelana ukuthi indawo yamaKhosikazi ithathwe yiQueen Lozikeyi.

Iqembu elitsha lingene umango lisiya eHarare kumdlalo wokuvula iligi yeWomen’s Super League lapho elafika lathola kubiyiwe, lehluleka lokuhlohla ibhola elilodwa kumdlalo walo leBlack Mambas.

Loba linqotshwe kabuhlungu, omunye wabaqondisi beNdlovukazi uJames Rugwevera uthe abethuki lutho ngoba benelisa ukuthi bagcine ingcitshi zabadlali babo ababeligiqa kumaKhosikazi.

Indlovukazi Queen Lozikeyi Academy

“Sibika ngokuthaba ukuthi iqembu le-Queen Lozikeyi likuligi ye-Women’s Super League,” kubika umqondisi lo.

“Kulandela ukuzwa ukuthi iBulawayo Chiefs ayisoze yenelise ukudlala kuligi enkulu, sahlala phansi savumelana ukuhlangana leMatabeleland Select, sabaliqembu linye, kwathiwa alibizwe kakutsha ngokuthi yiQueen Lozikeyi Academy.”

URugwevera, ohlonitshwa njengengcitshi kwezokuqeqetsha lokuqoqa ithalenta lenguqu ezikolo, ungumbalisi esikolo seMpopoma High. Uthe okwenza bazitshaye isifuba ngokuthi bazakwenza kuhle, yikuthi benelisa ukugcina abadlali, baphinda bathole abanye njalo abalethalenta.

“Sithe sisizwa ngokuthi Amakhosikazi awasoze adlale kuSuper League, kwabangcono ukuthi seboleke abadlali bethu kwamanye amaqembu. Ngibalisa amaqembu afana leHarare City, Burrow Jets, Yadah, Chipembere leFC Platinum.

Okuhle yikuthi abanye abadlali babengakabhaliswa ngakho sababiza futhi. Iqembu lizimisele ukwenza kuhle.”

Uthe kubadlali kuloNobuhle Majika, Thando Sibanda, Androla Mukuli loNomqhele Donga.

Kusenjalo, amaqembu akulumhlubulo welizwe kubikwa azakuba lomhlangano ngoMgqibelo, kuhlelwa ukuqala kwemidlalo.

“Kulumhlangano sizahlaziya iligi edluleyo, siphinde sihlele lokuthi imidlalo yethu yalonyaka iqala nini,” kutsho uSibekiwe Ndlovu, ilunga lebhodi yeligi ophethe imincintiswano.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds