Uncategorized

Zibakhalele akade bethwele inkomo (19) ezitshontshiweyo

08 Feb, 2024 - 00:02 0 Views
Zibakhalele akade bethwele inkomo (19) ezitshontshiweyo

uMthunywa

Ethel Ncube

KULAMADODA amabili eMganwini abotshwe kulandela ukubanjwa betshayela imota ebithwele inkomo ezitshontshiweyo ezingu-19 endaweni zeSigodini besiza koBulawayo ngoLwesithathu.

Phakathi kwalezi nkomo ezitshontshiweyo kubikwa ezimbili zifile.

Kuvele ukuba ababili laba nguEdmore Bhibhi loFarai Phambuka bonke behlala eMganwini. Kukhanya inkomo lezi bebezithwele besuka lazo esigabeni se-Fort Rixon lapho abaqale bamiswa khona ngomunye wezakhamizi obelombiko babaleka. Umuntu lo ubalandele emuva ekhulumisana lamapholisa waze wenelisa ukuthintana lamapholisa eCentral Police Station koBulawayo okubangele ukuba imota le ibanjwe.

 Emoteni bekulenkomo eziyi-13 ezinsikazi, eziyisithutha (6) zingezinduna. Ababili laba okwakhathesi basezandleni zamapholisa, bancedisa amapholisa ukuchwayisisa loludaba.

Intatheli ixhumane lesikhulumi samapholisa koBulawayo uInspector Abednico Ncube obike ukuba ababili laba basezandleni zamapholisa.

“Sibophe abantu ababili akade bethwele inkomo ngemota zingelancwadi, okwakhathesi basancedisa amapholisa ukuphenyisisa loludaba. Sibonga umuntu oncedise kwaze kwafika ithuba lokuthi kubanjwe abetheswacala laba njalo kutholakale inkomo lezi,” kuphetha uInsp Ncube.

Share This:

Sponsored Links