uMthunywa
Thokozile Mbedzi
KUBOTSHWE amadoda angu-11 esigabeni seGweru etheswa amacala ambalwa okugqekeza, ukutshontsha ehlomile, ukubulala, lokutholakala elemibhobho engekho emthethweni.
Kubikwa izigebengu lezi zibotshwe kulandela ukuqhutshwa komkhankaso wamapholisa esabelweni seNkabazwe oqhutshwe kusukela mhlaka 1 Mpandula kusiya ku-15 Mpandula.
Abethweswacala laba, uLondon Ncube (42), uJudge Dube (63), uComplete Mpofu (18), uPetros Chihavava (42), uBukhosi Mnkandla (22) oweLondon Farm eGweru, uEvans Muzabani (20), uWitness Nkomazana 22 oweRubi, uTawedzerwa Zhou (27) oweZvishavane, Evans Chikwenya (21) oweShurugwi loBrian Ncube (24) weMambo eGweru kubikwa besebedlisa imbuya ngoluthi izakhamizi zeGweru Rural District ngokudala amacala ehlukeneyo.
Isikhulumi samapholisa eNkabazwe uInspector Emmanuel Mahoko uthe babophe amadoda angu-11 abehamba egqekeza ezindlini ehlomile, etshontsha njalo ebulala.
“Amapholisa eGweru Rural District abophe amadoda angu-11 etheswa amacala okugqekeza ehlomile.
Ekubotshweni kwabo kutholakale izimota ezimbili; iNissan Vanette eyatshontshwa eShurugwi lenye iHonda Civic. Kutholakale imibhobho eyisikhombisa engekho emthethweni, i-pistol eyodwa, ama-bruno riffles amathathu lama-303 rifles amathathu, lenhlamvu zemibhobho, omakhalekhukhwini abangu-15, omabonakude, ama-gas cylinders, i-cutting torch lemali engangeUS$1 785. Ekuphenyisiseni kwamapholisa kuvele ukuthi i-pistol yangena elizweni ngendlela engekho emthethweni, eminye emihlanu yatshontshwa ngesikhathi begqekeza,” kulandisa uInsp Mahoko.
Abasolwa laba sebemisiwe phambi komthethwandaba njalo uJudge Dube watholakala elecala lokugqekeza lokutholakala elombhobho, uPetros Chihavava watholakala elecala lokuboleka umuntu ongamelanga atholakale elombhobho, uAdmire Mpofu loBukhosi Mnkandla batholakala belecala lokubulala njalo bavalelwe ejele bazaphinda bamiswe emthethwandaba ngoLwesine, uEvans Muzabani loWitness Nkomazana bona batholakale belamacala angu-10 okugqekeza. Laba bona bazabuyela emthethwandaba mhlaka 24 Mpandula.
uInspector Emmanuel Mahoko
Abanye abaseleyo batholakale belamacala angu-10 ngamunye okugqekeza behlome ngombhobho lelokubulala njalo bakhangelelwe ukubuyela emthethwandaba mhlaka 30 Mpandula.
Uphethe ngokuthi amapholisa athanda ukubonga uzulu ngokuphathisana lamapholisa ngesikhathi kuphenyisiswa ngamacala la njalo uzulu kumele abekwazi ukuthi kulicala elikhulu kakhulu ukutholakala ulombhobho ongekho emthethweni loba ukuboleka omunye umuntu umbhobho.
“Sifisa ukuxwayisa uzulu ikakhulu labo abalezikhali ezingekho emthethweni ukuba kabasebenzise lelithuba kusiyafika kumhlaka 30 Mpandula ukuthi bahambise imibhobho abalayo emapholiseni kungelamibuzo ebuzwayo,” kuphetha uInsp Mahoko.
