uMthunywa
Edson Khumalo
INHLANGANISO yeVeterinary Services ikhuthaza abalimi ukuzamela inkomo zabo amacebo okuthola amanzi kusase masinyane ukuze benelise ukwenqabela ukulahlekelwa yizifuyo njengoba izulu libe lilutshwana lonyaka.
Ekhuluma lentatheli kaMthunywa uDokotela wezifuyo, uKhulekani Sibanda uthe ukuswelakala kwezulu akutsho ukuthi izifuyo zingatholi amanzi.
“Ukuthi izulu lisuke laba lilutshwana akutsho ukuthi izifuyo azisanathiswa ngendlela eqondileyo amanzi ngoba lokhu kungabangela ukufelwa yizifuyo kubalimi, kungakho-ke abalimi kumele benze konke okusemandleni abo bephume lamacebo okunathisa inkomo zabo.
“Kusobala ukuthi izulu libe lilutshwana njalo abalimi kuqakathekile ukuthi babone ukuthi izifuyo zabo ziyathola amanzi enela lakusasa ngoba amanzi aqakatheke kakhulu ezifuyweni kungakhethekile ukuthi yisifuyo siphi,” kutsho uDkt Sibanda.
UDkt Sibanda uqhubekele phambili esithi ukukotshozela inkomo amanzi kuyazivikela ekucubeni ngesikhathi sebusika.
“Amanzi aqakathekile kakhulu enkomeni njalo kuyadingakala ukuthi inkomo ihlale ilamanzi okunatha ukwenzela ukuthi ivikeleke ekucubeni.”
UDkt Sibanda uphinde wakubeka kwacaca ukuthi ukudingeka kwamanzi asonto yenkomo kuphela, kuqakathekile lasezifuyweni zonke.
“Ukudingeka kwamanzi akulani lokuthi isifuyo yinkomo kumbe yimbuzi, izifuyo zonke ziyafuna ukunakekelwa ngesikhathi sokuswelakala kwamanzi.”
UDkt Sibanda uphethe ngokuthi nxa imbuzi ziswela amanzi kubangela ukuthi zicake njalo zingandi esibayeni.
