Yizililo zodwa…kukhala kuzekukhale le‘njiva’

13 Jun, 2024 - 00:06 0 Views
Yizililo zodwa…kukhala kuzekukhale le‘njiva’

uMthunywa

Nkosilathi Sibanda

KUYANGEKE lezizalwane zakuleli ezisebenza zihlala eGoli kulandela ukunqotshwa kwamaWarriors yiBafana Bafana leLesotho.

Besekuyisikhathi eside bacina ukubona iqembu lakubo. Kodwa, ukulikhanuka kuphenduke kwadala isililo, iqembu litshaywa liphendulelwa enkundleni.

Umkhankaso weWorld Cup ka2026 ubeluhambo olubi kuqembu lamaWarriors nanko ehluleke lokuthola umklomelo.

Iqembu lehluleke khona lokutshengisela ukuthi ngelesizwe nanko kumidlalo yalo leLesotho leSouth Africa akuzange kube ledlabuzane bobuqhawe, indlela amaWarriors adume ngayo enkundleni.

Kungumbiko ozwisa ubuhlungu ukuthi iZimbabwe itshaywe kabili, 3-1 yiSouth Africa, 2-0 yiLesotho.

AmaWarriors ahlohlwe amabhola amahlanu, okuveze ukuvuza kwemvimbi lonozinti lokuxegisa okubekhona phakathi kwenkundla.

Ebantwini abanengi abalandela umdlalo kanobhutshuzwayo leli bekuliqembu nje. Kabazange balamukele, kulandela indlela okwakhethwa ngayo abadlali labaqeqetshi.

Kukhethwe abadlali abangakaze bathole isikhathi bedlala ndawonye. Balolonge imidlalo yomibili phakathi kwamalanga ayisikhombisa ngaphansi komqeqetshi omutsha uJairos Tapera, okade echinsa ukukhuza kuzinga lemidlalo yenkezo yomhlaba.

Lokhu kwabonisa abasekeli bamaWarriors ukuthi luzakuba nzima uhambo lokuzama ukufika kuWorld Cup. Kugcwalisekile lokhu, nanko abafana baphenduke begoqwe izandla.

Imibono yabalandeli abakhulume lentatheli yeZimpapers Sports Hub iveza ukuthi iqembu kalilungiselelanga kakuhle. Bakhala ngokuthi sekuyinjwayelo ukuthi nxa amaWarriors esiyadlala, iziphathamandla zisukumela phezulu sekusele amalanga ambalwa ukuthi kudlalwe.

Abanye babalandeli laba ngabakade belibukele eleSouth Africa leZimbabwe enkundleni yeFree State, eBloemfontein.

Kuthengiswe wonke amatikiti alumdlalo, kunkundla okubikwa ihlala abantu abangu-45 000.

Umlandeli wenguqu obebukele ibhola labangane bakhe kwenye indawo yokuzithokozisa uCasper Ndiweni uthe amaWarriors ayangise ilizwe.

“Savele sabona ukuthi kudlalwa ngathi laphana. Kwaqala kudala ukuthi siyezwa kuthiwa sekulomdlali othile kodwa singakaze simbone edlala kumbe kubizwe abadlali ngenxa yokuthi balamabizo adumileyo. Kubo bonke abalabizo asindayo, nguphi owenze kuhle?

“Siyakhala loba bekuliqembu esikade singalikhwabithi. Kubuhlungu ukuthi sidliwe kalula ilizwe lilabadlali abanengi abangcono kulalabo esikade sibabukele. Eqinisweni, basiyangisile,” nguNdiweni lo.

U-Archford Velile Khumalo uthe inkinga ivele kubalandeli lomqeqetshi.

“Kulabadlali okungamelanga babekhona laphana. Kangibongana ukuthi uTino Kadewere ubelandeni. Wehlulekile umqeqetshi, wehlulekile sibili.”

Enkundleni zokuxhumana kuFacebook laku-X, kuphose kwaqhamuka impi ngokutshiyana kwemibono. Abadibana kuFacebook bangabe bethethe “inkezo” ngobunengi babo.

U-Welook Dube uthe loba iqembu linqotshiwe, kumele kulungiselelwe ikusasa.

“Ikusasa lilokukhanya. Kasikhohlweni ngumncintiswano lo, sivuselele iqembu lethu. Kumele sithole ukuhlanganisa abadlali lokuthola umqeqetshi.

UMandlenkosi Sanele Majola oseSouth Africa uthe: “Bomakhelwane baseZimbabwe lingaqineli abadlali. Abadlali benu benze kahle kakhulu, ikakhulukazi ngesigaba sakuqala.

“Lileqembu elihle, abadlali benu abasesiswini basebancane njalo bagcwele umfutho badinga ukuthuthukiswa lapha lalaphaya,” kutsho lumlandeli webhola ekhasini lenhlanganiso yeZifa kuFacebook.

Umqeqetshi uTapera ugcone imvimbi zakhe ngokuhlohlwa kwabo kodwa laye UTapera utshengisele ukucitshelwa emqondweni kusigaba sesibili emdlalweni yomibili.

“Sizifake engozini ngokwehluleka ukuvimba amabhola. Cabanga, ngomzuzu wakuqala, imvimbi yethu ephakathi yenze iphutha okungamelanga lenzeke kubanga lemidlalo le. Siphange saphenduka emdlalweni ngokuhlohla. Lapho sizibambile, saqala ukudlala kakuhle.

“Besicabanga ukuthi sizathola ibhola lesibili kodwa, ngenxa yokwekethisa, basihlohlile. Kahle, kahle besingamaki ibhola emsindweni wegedi. Yikho okusijezisileyo. Ibhola lesithathu basitshaye phakathi kwenkundla, basithola sivuleke emuva, sajeziswa njalo,” kutsho umqeqetshi lo.

Kumdlalo leSouth Africa iqembu leZimbabwe lihlohlelwe nguTawanda Chirewa, obalwe njengomdlali owedlule bonke kumaWarriors.

UChirewa udlalela iqembu leWolves eleNgilandi.

Ukunqotshwa kwamaWarriors kutsho ukuba alokhe eyibambe emsileni kulogu yamaqembu, elemiklomelo emibili. Kukhokhela iRwanda elemiklomelo eyisikhombisa, kulandela iSouth Africa leBenin ngenani elifanayo. Abafana beLesotho bakunombolo yesine belemiklomelo emihlanu. INigeria ilandelwa iphethe emithathu.

 

 

 

 

Share This:

Sponsored Links

Survey


We value your opinion! Take a moment to complete our survey

This will close in 20 seconds