Yizibhakela nge-Africa Day ePalace

17 May, 2024 - 14:05 0 Views
Yizibhakela nge-Africa Day ePalace

uMthunywa

Innocent Kurira

ABATHANDI bomdlalo wezibhakela, i-boxing sebenxuswe ukuthi baze ngobunengi babo ePalace Hotel ngosuku lwe-Africa Day lapho okuzadibana khona ingqwele ezidabuka kuzabelo zonke zelizwe.

Umqhudelwano wengqindi lo uzaqhutshwa yinhlanganiso yeZimbabwe Boxing Federation, isekelwa yiPalace Hotel, esihamba phambili ngokukhankasela ukukhula kwe-boxing koBulawayo.

Abadlali abazangena esitikini bahlanganisela abazimele bodwa lalabo abaphuma kumaqembu athile. Amaqembu la yiZimbabwe National Army, Zimbabwe Prisons and Correctional Services, Air Force of Zimbabwe, Tshaka leNketa, Black Rhinos, HQ 1 Brigade, 5 Brigade, Bulawayo Metropolitan, Zimbabwe Prisons and Correctional Services, Air Force of Zimbabwe, Bulawayo, Harare, Midlands, Victoria Falls Boxing Academy, Manyuchi Boxing Academy, Masvingo, Gwanda le Hwange kunye lamanye asemalokitshini akoBulawayo.

Umqondisi weZBF, uSteven Masiyambumbi uthe benza amalungiselelo.

“Amalungiselelo ethu omncintiswano we-Africa Day ahamba kuhle. Sihlose ukunika abatshayi besibhakela ithuba lokuthi badlale kumincintiswano eminengi,” kutsho uMasiyambumbi.

“Sithanda ukubonga usekelo esiluthole kubaphathi bePalace Hotel. Uthando lwabo kulumdlalo luyasikhuthaza njalo kwenza labadlali bakhuthalele ukuncintisa.

“Sikhuthaza abalandeli ukuthi babuye ngobunengi babo bagcwalise inkundla nge-Africa Day.”

Umqondisi wePalace Hotel uTapiwa Gandiwa uthe bazahlala besekela umdlalo lo.

“NjengePalace Hotel, okwethu yikuthi sisekele imisebenzi emihle efana lalokhu okwenziwa yinhlanganiso yeZimbabwe Boxing Federation, ekuphakamiseni abadlali be-boxing kuleli.

“Sigqugquzela ukuthi sincedise ekwakheni ilizwe ngokusekela abasakhulayo abalesiphiwo kwezemidlalo. Ngokwenza njalo, sitshengisa umphakathi ukuthi njengebhizimusi, siyingxenye yengqubekela phambili kuleli,” kutsho uGandiwa.

Share This:

Sponsored Links

Survey


We value your opinion! Take a moment to complete our survey

This will close in 20 seconds