uMthunywa
YiNtatheli kaMthunywa
KULENINA lesigabeni seMusami eMurehwa eliphakathi kwamalangabi nanko phela liphila lenkalakatha yesisu okungathi sizadubuka njalo kubikwa lokhu kwaqala ngemva kokudla inyama yenkukhu ayiphekelwa ngesinye isihlobo sakhe.
UNkosazana Maria Chitsamba (45), ohlala ngaphansi kwenduna uMangwende, owehlukana lomkakhe uthe kulezihlobo ezisabalalisa amanga okuba wakhukhumala isisu ngemva kokutshontsha inkukhu kukanti abanye bathi lokhu kungabe kwabangelwa yikuthandana lendoda yomnikazi.
“Ukuthi ngakhukhumala isisu ngoba ngitshontshe inkukhu ngamanga. Abantu kabalanhloni ukuthi ngithi ngizigulela nginje babe bengizwisa ubuhlungu ngamazwi.
“Abanye bathi ngalala lendoda yomnikazi ngalungiswa. Mina ngangendile kodwa sehlukana lomkami. Isisu sami saqala ukuvuvuka ngomnyaka ka2017 ngemva kokuphekelwa inyama yenkukhu ngesinye isihlobo sami,” utshonjalo.
Inina leli lihlala labantwabalo ababili; omunye oleminyaka engu-12 loleminyaka eyisithupha.
Uthe wavakatsha evela lapho ayendele khona, wafika wamukelwa yisihlobo sakhe esamhlabela inkukhu ayidla yedwa kwathi eyasalayo wayithwala.
“Ngahlatshelwa inkukhu, kwangimangalisa ngoba isihlobo sami leso siyancitshana njalo ngazibuza ukuthi kungani engenzele umusa. Inkukhu leyo yakhanzingwa epanini, enye inyama yagcinwa.
“Ngadla inyama le lesitshwala ngedwa eyinye ngayithwala kodwa ngelanga elifanayo isisu sami saqala ukuba buhlungu kwahle kwaba yikho ukuqala kokukhukhumala kwesisu sami,” kutsho yena.
Inina leli lithi kalikaze lithengise umzimba njengabanye abantu.
“Kulabo engiya kubo ngidinga uncedo bathi ngaloywa ngenyama yenkukhu. Ngiyahamba njalo esibhedlela bafike bangikhiphe amanzi esiswini, lamhlanje lithole sibohlile isisu sami ngoba ngivela khona esibhedlela.
UMaria usephila ngokucela nanko phela usetshona elele ngoba akulamsebenzi enelisa ukuwenza.
“Ngiyahamba esibhedlela nyanga zonke. Esibhedlela kufuneka imali enengi engingenelisiyo ukuyibhadala. Ngangiphila ngokuthenga ngithengisa kodwa khathesi kangisenelisi ukwenza lokhu.
“Okokudla lempahla zami lezabantwana kangilakho. Impahla engilazo kazisangeni emzimbeni osokusenza ngihlale ngithandele ilembu.
Uqhubekele phambili esithi ngesikhathi udubo lwakhe lolu luqalisa wayekhupha igazi kodwa kwaphela ngokuya kwesikhathi. Abazali bami bonke babhubha kanye labanye engizalwa labo, sengisele lomnewethu. Akula engingakhala kuye ngaphandle kokuthi ngibikele iNkosi enguMdali. Kangikwazi ukuthi ngizakudlani litshona ilanga lelinye liphuma, abantwana labo bahamba esikolo bengadlanga. Ngazama ukugcina inkukhu lemvundla kodwa kwatshontshwa ngoba lapha akulandoda.”
UMaria uthi uyafisa ukuya kubodokotela bakwamanye amazwe kumbe kwabazimeleyo abakuleli okubikwa ukuthi bafuna iUS$6 000 ukuthi ahlinzwe.
UMarbel Manyonga ongumalukazana kaMaria ugcizelele ukuthi abantu bathi ubabakazi wakhe ukhukhumala isisu ngoba watshontsha inkukhu.
Kulabo abafisa ukuncedisa inina leli bangathintana laye ku-0776124162 kumbe ku-0771858543.
