uMthunywa
Ethel Ncube
INDUNA yeTsholotsho uGampu isiveze ukuthi amalungiselelo okulima insimu engamahekitha amabili yeSiphala seNkosi aseqalisile ngenhloso yokuthi labo abaswelayo esigabeni bathole usizo kusivuno esizatholakala.
Induna uGampu iveze ukuba lonyaka abantu besigabeni sakhe basebenzisa indlela eyalethwa nguHulumende yokulima engezelela isivuno eyeNtwasa kungakho sebeqalile ukugebha amagodi kagatshompo ukuze benelise ukulima ngesikhathi.
Intwasa
UMthunywa uxoxisane lenduna uGampu oveze ukuba abantu bendawo yakhe baqale amalungiselelo la ensimini yeSiphala seNkosi ngeviki ephelileyo.
“Izakhamizi ziqale ngeviki ephelileyo ukugebha amagodi ensimini yesiphala seNkosi. Izakhamizi zonke nje ziyabe zikhangelelwe ukuthi ziphatheke kulo umsebenzi ukuze uphumelele.
“Ekugebheni kwamagodi lokhu izakhamizi zizabe zisebenzisana labalimisi ukuze benze okuqondileyo,” kutsho induna uGampu.
Uqhubekele phambili eveza ukuba ukuvuselela ukulima insimu le kuzaphakamisa isigaba lesi.
“Sikhangelele ukuthi ensimini le, engamahekitha amabili silime indumba, amazambane lomumbu kodwa okuzalinywa kakhulu ngumumbu. Kungalinywa kuvuthwe akuyi esiphaleni senduna kodwa isivuno lesi sihanjiswa esiphaleni seNkosi.
“Isivuno lesi sizagcinwa esiphaleni seNkosi ukuze siphathise abaswelayo kunye lentandane,” kuphetha induna uGampu.
