YiMtshibini Young Stars leLupane City

05 Dec, 2019 - 00:12 0 Views
YiMtshibini Young Stars leLupane City

uMthunywa

YiNtatheli kaMthunywa

AMAQEMBU amabili akunguqu yeLupane Soccer League iMtshibini Young Stars leLupane City akhangelewe ukuthi atshikilisane kubangwa ukuba yingqwele yeligi le kumidlalo embalwa esisele.

Kubikwa sekutsheka lebhulugwe kubadlali ngoba bekubona ukuthi injabulo iseduzane. ILupane City ingabe ihamba phambili isimumethe imiklomelo engu-26 kodwa angeke ihlalele izandla kuqembu leMtshibini Young Stars ele-21 ngemva kwemidlalo elitshumi lanye. Imiklomelo emihlanu eyehlukanisa amaqembu la ayitsho lutho kulesi isibanga, ikakhulu nxa iLupane City ingaxegisa kumidlalo ezayo.

Inguqu yakulindawo ingaphansi kwenhlelo zeZifa njalo ilamaqembu asemthethweni ayisikhombisa kuphela.

Okuhle okungakhukhumeza iCity yikuthi isihlohle amabhola amanengi.

Ngaphansi kwengalane kuhlezi iMhlahlandlela ebambe imiklomelo emibili nje, phezulu kwayo kule Invaders ele-10. Ezinye ezincintisa kuLupane Soccer League kule Shining Stars, iHotspurs leUnited Forces.

Iqembu le-United Forces lidlalelwa ngamapholisa akuZRP labaphathi bamajele.

Kusenjalo, ukusungulwa kweligi yenguqu eyeLupane le sekukhweze idlabuzane kubalandeli balumdlalo lamaqembu abo, nanko sekuvele losekelo lwemali kumaqembu lakuligi.

Isikhulumi seLupane Soccer League uPermanent Sibanda utshele iphephandaba likazulu ukuba ukubunjwa kweligi le kwavela ekuthini bafuna ukuphakamisa ithalenta lezemidlalo eLupane.

Ngokutsho kukaSibanda, sekubonakala ukuthi kulethalenta elizwayo kulindawo. Ubike ukuthi ukusungulwa kweligi le kuza lamathuba amahle ngoba abadlali bezigaba ezehlukeneyo sebezaziwa labo kulumdlalo.

“Sikhangelele ukuthi sokuzakuba lomncintiswano omkhulu ikakhulu ukuphuma kwethalenta elicatshileyo emaphandleni. Iligi yeLupane Soccer League ihlose ukuvusa isigaba sethu.  Idolobho leLupane yisigodlo seMatabeleland North ngakho kubalulekile ukuthi ukukhula kwalindawo kusekelwe yimidlalo enjengenguqu,” kutsho uSibanda.

Ukusabalala kwenguqu yeLupane kubonakala ngokusungulwa kwamaqembu ahwatsha ingcitshi zabadlali abalisa iMhlamhlandlela elabadlali abaphuma esiqintini seMatshiya, iShining Stars eyeLupanda le-Invaders eyeShabula.

Kumasizini adluleyo inguqu yeLupane lezinye indawo eziseduzane ibiphelela eduzane. USibanda uthe iligi le ayisoke ifadalale.

“Ngemva kokudlala, siqoqe ukuthi kubongwe abadlali bethu bonke kumkhosi wokunikeza iqembu elizakuba yintshantshu yesizini.

Share This:

Sponsored Links