Nkosilathi Sibanda
ABADLALI be-basketball esabelweni seMatabeleland North sebebophe iqhinga lokuvuselela lumdlalo kulindawo ngokuqoqa imincintiswano eqhutshwa maviki onke edolobheni leHwange.
Kulandela ukutshabalala kweligi yeMatabeleland Basketball Association (Maba), inengi lamaqembu belingasela lapho elingancintisa khona, okudale ukuthi abadlali bekhalale umdlalo, kwaba lokudilika kwamaqembu athile.
Umdlalo we-basketball eMatabeleland North udlalelwa ngamaqembu aphuma eFolosi, Hwange, Lupane leDete.
Kube ngumbono wequla elikhokhelwa ngumqondisi weqembu leBlack Hornets, uPenrick Ndlovu ukuba kusungulwe imidlalo yobungane ehlose ukubuthanisa amaqembu ukuze kubunjwe indlela yokuqala iligi lokuvuselela umdlalo.
UNdlovu ngoLwesibili wazise iphephandaba likazulu ukuthi sebeqale imidlalo okuthiwa ngama- “Colourful Basketball Weekends” lapho okudlalwa khona impelaviki zonke kunkundla ezisedolobheni leHwange.
Kumaqembu la kuncintisa iBlack Hornets, Royal Eagles, Ghetto Magics, Madumabisa leVictoria Falls Panthers.
Andubana kutshabalale iligi yeMABA, isabelo seMatabeleland North besilamaqembu ayedlula itshumi aphatheka kuligi ephezulu. Isizatho sokuqhutshwa kwemidlalo eHwange, ngokutsho kukaNdlovu yikuthi yikho lapho okusalenkundla ekusimo esingcono.
“Sesidlala impelaviki zonke ngaphansi kohlelo lwethu lwemidlalo oluthiwa Colourful Basketball Weekends. Njengoba sesingela lapho esingancintisa khona okuzwayo, sikhethe ukuthi sibuthanise amaqembu akhona, kube lemidlalo ezakwenza kubelula ukuthi sivuselele imincintiswano endaweni yakithi,” kutsho uNdlovu.
“Kwelizayo sikhangelele ukuthi sinxuse amabhizimusi alakho ukuthi axhase imidlalo yethu ngoba eqinisweni, amaqembu awalamali njalo adinga usekelo ukuze kulolongwe ithalenta kulumdlalo.
Siyabonga ukuba lokhu esikwenzayo kwamukelwe kuhle zinkokheli kunhlanganiso yeBasketball Union of Zimbabwe.”
Umongamelo we-Basketball Union of Zimbabwe uJoe Mujuru uhlezi egcizelela ukuba ukukhula komdlalo lo, kuqala ngokuphakamisa ithalenta elingaphandle kwamadolobho amakhulu.
“Akula mdlalo okuthiwa ngowemadolobheni kuphela, yikho ngemva kokunanzelela ukuthi siyasilela emaphandleni, sesicabange ukuthi siqine kakhulu kundawo ezingaphandle kwamadolobho.
“Inhlelo zethu zokusabalalisa umdlalo ziqale kuminyaka emithathu edluleyo lapho esedlula khona emadolobheni amancinyane abalisa iPlumtree leHwange.
“Kungumbono wethu kuBasketball Union of Zimbabwe ukuthi umdlalo angeke uthole ithalenta elitsha ngaphandle kokuthi sifinyelele zonke indawo,” kutsho uMujuru.
Ngempelaviki edluleyo iqembu leBlack Hornets linqobe eleMadumabisa nge 52-14, kumdlalo obusenkundleni yeSports Pavillion. Abafana beRoyal Eagles benze umathanda bebhuqa iGhetto Magics nge 49-27 elokitshini leMakwika eHwange.
Kusenjalo, imidlalo iyaqhubeka kulimpelaviki lapho okuzadibana khona iMadumabisa leGhetto Magics, kuthi iBlack Hornets izanxuswa yiRoyal Eagles.