Nkosilathi Sibanda
ILIGI yeCastle Lager ingena kuviki yamatshumi amabili lanye ivula umdlalo omkhulu kulayo yonke phakathi kweHighlanders leDynamos eMagumeni.
Lumdlalo uvusa amehlo ngoba amaqembu omabili asedabule inhliziyo zabalandeli ngokudlala udaka kumidlalo elitshumi edluleyo. I-Highlanders ikhangelelwe ukuthi inqobe ngoba isekhaya kodwa ilakho ukudanisa njalo njengoba ikhanya ukuthi ayikatholi umgadli obukhali.
Umqeqetshi wayo uMadinda Ndlovu ukhala ezimathonsi ngokuyekethisa kwabadlali bakhe, ebika ukuba usekhathele ngokukhuza kokuphela.
Ngeviki edluleyo uphume emphakathini ebika ukuba kuzamele anqobe kulumdlalo loba sekutheni.
“Into engiyifunayo yikunqoba iDynamos,” kutsho uMadinda.
Kumdlalo wamaqembu womabili kusigaba sakuqala seligi, uMadinda wagcizelela ukuba njengoba iHighlanders kuliqembu le-ECD, abadlali balandele isixwayiso sikambalisi ngakho abalandeli bazalinda ngeSonto ukuzwa ukuthi lumqeqetshi wenzeni enkambeni.
Kubalandeli beHighlanders, ilanga langeSonto libakhumbuza iqembu labo lakudala, elalinqoba mihla yonke, lithwala lenkezo.
Kusenjalo umgadli Ozias “Ozozi” Zibande usebolekiswe komakhelwane iBulawayo Chiefs.
Ezinye eziphuma koBulawayo ezisekhaya kumdlalo wesigaba samatshumi amabili lanye weCastle Lager yiBulawayo City enxuse izimbamgodi zeFC Platinum eMagumeni ngoMgqibelo.
IChicken Inn iqonda eNgezi Platinum ukuyadibana leqembu elilenkani. IChicken Inn ibambe uvalo isiyahlasela iShabanie enkundleni yeMaglas.
Imidlalo yeCastle Lager kulimpelaviki:
NgoMgqibelo: Bulawayo City v FC Platinum (Barbourfields), Chapungu v Bulawayo Chiefs (Ascot), Ngezi v Nichrut (Baobab), Yadah v Herentals (National sports stadium), Harare City v Mutare City (Rufaro), ZPC Kariba v Triangle (Nyamhunga)
NgeSonto: Highlanders v Dynamos (Barbourfields), Caps United v Black Rhinos (National Sports Stadium), Shabanie v Chicken Inn (Maglas)