uMthunywa
Nkosilathi Sibanda
ANGITHI kunjalo, yebo!
NGOLWESINE abathandi bomculo wembaqanga bazathi ukuthola isipho seKhisimusi ngokuza kweqembu lama-Soul Brothers koBulawayo.
Ziqhunswa zonke ezama-Sololo, sekukhunjulwa mzwana kusemnandi, kukhonjwa ngophakathi.
Iqembu laseSouth Africa leli lithembisa ukuthi bazakholisisa abadala labasakhulayo abakhwabitha umculo wabo.
Abalandeli beqembu bacina ukulibona ngo-2017 kumcimbi owawuqoqwe ngumsakazo weSkyz Metro.
“ Isikhathi eside lesi sesidale isizungu, okuyikhona okuzenza kugcwale phamu enkundleni yeCity Hall.
Bulawayo City Hall
Umkhokheli weqembu uBlack Moses Ngwenya uthe bazaqhunsa ezakudala ezahlanyisa asebekhulile, njalo balezinye ezitshisayo ezizadonsa lama-2000.
“Sizabakhumbuza besakhula, besebancane. Bazakhumbula ingoma ezazithandwa ngabazali babo.
“Abanye kuzoba buhlungu ngoba bazakhumbula abazali abangasekho ababedlala ingoma zeSoul Brothers. Kodwa sithembisa ukuthi wonke umuntu uzajabula, ikakhulu lalabo abasibona okokuqala,” kutsho uBlack Moses.
“Sifake ingoma ezintsha lezindala ezibalisa Iqiniso, Uphelile Umndeni Wami lapho iqembu elikhalela khona amalunga angasekho afana loMasondo, uZulu, uZenzele Mnchunu, uMthethwa, Japan Sidoyi, Sipho Bhengu noMngandi kunye lethi Hluphekile, Mantombazane, Xolisa Izinto, Heyi Wena, Hamba Ntombi lezinye.
Iqembu lama-Sololo lilandelwa kakhulu kulumhlubulo welizwe. Izazi zomculo wembaqanga zibeka inhlonipho enkulu kuSoul Brothers ngokuphakamisa lumculo.
UNgwenya uthe bayaluthokozela uhambo lokuza koBulawayo.
“Sijabule kakhulu ngokumenywa eZimbabwe, ngoba silenkumbulo yakudala ngemidlalo yethu esasiyenza loZenzele Mnchunu loDavid Masondo besaphila.”
