Ethel Ncube
UKUTSHENGISA uthando emuntwini wakho akudingi imali. Nxa ungazange uqoqe lutho ngosuku lwe-Valentine, kungangcono uqonde enzikini yezitolo zeNsuza ngoLwesihlanu.
Usomabhizimusi ozwayo, owesiqintini sika-2C kulindawo, uMehluli “Mamba” Ncube uqoqe idili elikhulu lokuthakazelela izithandani kulindawo, lapho anxuse khona abahlabeleli bodumo kuleli ukuthi bathokozise abantu ngaleli ilanga.
UNcube, othanda ukubizwa ngelithi “Mamba” utshele iphephandaba likazulu ukuthi unxuse zonke izithandani lalabo abasadinga umaqondana wabo ukuthi basondele esidikidikini sezitolo zeNsuza bezokholisa mahala ilanga lonke. Uthe abantu bazazitika ngokudla lokunye okunathwayo mahala.
“Buya lesithandwa sakho uzokholisa. Sinxusa wonke umuntu ukuthi azokhulula inhliziyo yakhe sinanza ilanga lothando, elithakazelelwa umhlaba wonke. Singabantu ngoba siphile ethandweni, ngakho ngithi wozani sijabule sisonke eNsuza,” kutsho uNcube.
Uthe kuzaba ncane indawo ngoba unxuse abahlabeleli ababalisi
Uthe kuzaba ncane indawo ngoba unxuse abahlabeleli ababalisa uZinjaZiyamluma, Mr Mxolisi Bones, Amathonga Amahle, leNgane yabaPostoli. Abaculi laba bazaqhunsa kuze kuse.
Uthe lokubukela abaculi laba kuzabe kuyimahala.
“Ilanga le-Valentine’s lilanga elihle njalo lilanga lothando. Uthando lubambanisa abantu njalo lubenza behlale bejabule kakhulu.
Mehluli “Mamba” Ncube
Mina ngikhethe ukuba ngenzele abantu besigabeni sami umcimbi wokuthakazelela iValentine’s Day kungembhadalo. Ngizabenzela konke. Ukudla lomcimbi wabaculi yimahala.
Ngifuna ukuthi wonke umuntu walapha loba ngomncane kumbe ngomdala akholise ilanga lothando ngendlela ekhethekileyo, ekoMamba esidla ekholisa ebukele abaculi begida.
“Ngifisa ukuba abantu bakithi bafunde ukuba bahlalisane kuhle ezindlini kungabi khona ohlukumezana kumbe ophakamisa isandla etshaya owesifazana. Ngenza umcimbi lo ukuze kubekhona abakufundayo. Ibhizimusi lami lisekelwa ngabantu, ngakho lami ngithi ngibaphe isibongo seValentine’s Day mahala,” kubika uNcube.
Uthe kakhethi muntu njalo ufuna ukuthi ngemva kumcimbi, abantu batshengiselane uthando ukuze iNsuza, lesabelo seMatabeleland North jikelele siqakathekise uthando.
“Nansi isicelo sami, bantu Bakithi, zakhamizi zeNsuza. Ngithi kini, ngilinxusa eBusy Corner koMamba ku-Village 2C sizothakazelele usuku lothando ndawonye. Ukudla lizadla lize likukhangele. Wonke umuntu uzakudla, akula ozaswela.
Abahlabeleli elihlala libalalela kuma-USB lasebulenjini lizababona ngamehlo, hatshi ukubezwa behlabela kuphela. Abathanda ibhola kuzabe kulamaqembu atshiyeneyo azabe edlala lizabukela likholisa. Asizeni ngobunengi sizokholisa sithakazelela ilanga lothando,” nguNcube lo.
