Yenza izimanga iDombodema High School

09 Jun, 2022 - 00:06 0 Views
Yenza izimanga iDombodema High School Amantombazana aweDombodema emukela inkezo kummeli weBulilima West ePhalamende uDingumuzi Phuti kanye lomphathintambo wogatsha lwezemfundo uDokotela Evelyn Ndlovu

uMthunywa

INTSHA yesiqintini seBulilima West isikhuthazwe ukuthi ikhuthalele ukuphatheka kwezemidlalo ukuze yandise amathuba okuthola ingqubekela phambili empilweni.

uDingumuzi Phuti

Lokhu kukhulunywe ngummeli weBulilima West ePhalamende uDingumuzi Phuti ngesikhathi ecebisa abantwana besikolo kumbuthano wemincintiswano yezemidlalo eqhutshwe esikolo seDombodema High ePlumtree ngempelaviki.

Inhloso yemincintiswano le, ebigoqela inguqu lomdlalo wokuqaga, ibingeyokubambanisa umphathi weBulilima West.

“Lokhu sikwenzela ukuthi sibambanise abantu bakithi.

Sifuna ukuthi abantwana besikolo bakhuthalele ezemidlalo lokunye okungaphathelanga lengwalo ukuze bakwazi ukuthi bangaziphilisa,” nguPhuti lo.

UPhuti uthe umbuthano wemincintiswano lo uzaqhutshwa minyaka yonke ezikolo.

Isikolo seDombodema High sibe yintshantshu kubhola lenyawo kulandela ukunqoba kwaso Ivimila Secondary nge 1-0.

Siphinde senza kuhle lasemdlalweni wokuqaga sibhuqa Ivimila nge13-4.

Ngokwenza kanje, iDombodema High ithole imivuzo lokuthi yenelise ukusebenzisa amagagasi e-WiFi mahala okwenyanga ezintathu.

UPhuti ophinda abengumsekeli kamphathintambo kugatsha lwe-Information Communication Technologies, Postal and Courier Services uthe injongo yakhe yikuvulela abasakhulayo ithuba lokuthi batshengise ithalenta labo kwezemidlalo.

Kungumbono wakhe umkhokheli lo ukuthi isiqinti seBulilima West kumele sibumbe abantwana abalembeko abazi ukuqakatheka kwenhlonipho lengqubekela phambili.

“Inhloso ngemidlalo le igxile ekuthini kumele sifundise abasakhulayo ngokuqakatheka kwemidlalo efana lenguqu lokuqaga.

Ngithi kubo nanti ithuba lokuthi bazitshengisele emphakathini ngeziphiwo zabo,” nguPhuti lo.

Inkampani yeTelOne ibisekele imincintiswano le.

Ekuqaleni komnyaka, uPhuti wenze idili lemidlalo futhi esiqintini sakoTokwana lapho okwadibana amaqembu abasakhulayo abavela koMacingwane, Zimnyama, Dombolefu, Dombodema, Vulindlela, Malanswazi, Hingwe, Bambadzi, Ndolwane, Makhulela, Madlambudzi, Masendu lakoNxele.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds