uMthunywa
Ethel Ncube
KULANDELA ukukhwela kwenani lenkomo ezitshontshwayo esabelweni seMatabeleland North, amapholisa asexwayise abafuyileyo ukuthi babone ukuba inkomo zabo ziyeluswa zonke izikhathi.
UInspector Glory Banda oyisikhulumi samapholisa eMatabeleland North, uthe sebenanzelele ukuthi inkomo ezinengi ezitshontshwayo azeluswa kukanti ezinye ziyabe zingelalo lophawu okwenza kubenzima ukuthi zaziwe ukuthi ngezangaphi zingatshontshwa.
UInsp Banda uthe abalimi kumele babone ukuba bayadinga abelusi abakhangela izifuyo zabo ukuze kulwiswe ukutshontshwa kwezifuyo.
Ulnspector Glory Banda
“Ngikhuluma nje kulenkomo eziyisifica munwe munye ezacatshayo eNyathi. Inkomo lezi zacatsha zisanda kuvulelwa, kuthe ntambama sezisiyabuthwa zasezingasabonakali. Inkomo lezi zacatsha ngenyanga kaNcwabakazi kuze kube khathesi kazikabonakali.
“Njengamapholisa-ke sikhuthaza abantu ukuthi inkomo zabo kazibe lomtshiso ukuze lapho ezibonakala khona kubelula ukuthi zaziwe ukuba ngezangaphi,” kuveza uInsp Banda.
Uqhubekele phambili ecebisa uzulu ukuba inkomo kumele zilindwe.
“Abantu okunye abangakwenza ukuba inkomo zabo zingatshontshwa yikuthi nxa uzivulela uhle uzilinde lapho eziyabe zisidla khona, ungazitshiyi zodwa nxa zingeluswa zisemadlelweni kuba nzima ukuthi amasela azitshontshe,” kuphetha uInsp Banda.
