uMthunywa
Wayne Ncube
IZIMBABWE Olympic Committee isikhuthaze abadlali, labaqeqetshi kanye labo bonke abakwezemidlalo ukuba batshiyane lobugwelegwele emidlalweni kulandela ukuxotshwa kwabadlali bama Under 17 kumdlalo yeCOSAFA.
Inhlanganiso yeZOC ikubone kuqondile ukuba kusasa kanye langoLwesihlanu iqhube uhlelo lokufundisa uzulu wonke othinteka kwezemidlalo ngobugwelegwele obufana lokubhadala abadlali ukuba badliwe, ukudlalisa abadlali ngokungekho emthethweni kanye lokusebenzisa izidakamizwa ukuthola inzuzo.
Ekhuluma loMthunywa uLawrence Kamukapa omele inhlanganiso le, uthe njengenhlanganiso bafuna ukufundisa abadlali, abakhokheli, abaqeqetshi kanye labaxhasa ezemidlalo ngokuqakatheka kokuthembeka kwezemidlalo.
“Njengelizwe sehle isithunzi ngesikhathi kuvinjwa abadlali bakuleli ukuba bengasadlali kuCosafa ngakho thina sifuna ukufundisa abantu ukuze singaphindi sihlangane lodaba olunje,” kuchaza uKamukapa.
Uhlelo lwethu lokufundisa lungezigaba ezimbili lapho kusasa sikhangelele ukufundisa kakhulu abadlali ukuba bangenza njani ukuze bangazitholi besesimweni sobuqili emidlalweni, ngelanga lesibili sizakhangela kakhulu abaqeqetshi bamaqembu.
Kuvamile ukukhohlisa ngeminyaka ezikolo ezinengi, lapho abadlali abakhulileyo abadlaliswa labancane ngokungekho emthethweni.
UKamukapa uphethe ngokuthi: “uhlelo lolu sifisa lube yimpumela ngoba injongo yalo yikupha wonke umuntu osebenza ngezemidlalo ulwazi ngobugwelegwele kanye lezijeziso zobugwelegwele emidlalweni.”
