YiNtatheli kaMthunywa
UMGCINISIHLALO weHighlanders FC uKenneth Mhlophe uthe akulanto ehambayo emgodini wegolide waleliqembu.
Ubike ukuba uthe engena esikhundleni, uthole kungela okwenzakalayo. Umgodi lo useNyathi, esabelelweni seMatabeleland North.
IBosso yathola imvumo yokwemba igolide kuMongameli uMnangagwa ngo2020. Injongo kwakuyikuthi iqembu leli lidinge imali ngezinye indlela, lenelise ukucabanga phandle kwebhokisi lomdlalo, lizimele lodwa.
Ukwemba igolide kukhangelelwe ukuthi kuphathise iqembu ekutholeni imali ukuze liqhube kakuhle inhlelo zalo.
UMhlophe uthe sebehambise amaphepha okwemba igolide kakutsha, ukwenzela ukuthi baqale umsebenzi.
“Ngathola kungelalutho, kungela okwenziweyo. Sengihambise amaphepha kugatsha lweMines and Mining Development ukuthi kulungiswe, siqale ukusebenza,” kutsho uMhlophe.
Uthe iHighlanders izavumela abangabe befuna ukusebenzisana layo, belolwazi kwezokwemba igolide.
Ukuqala ukwemba igolide kuzancedisa iHighlanders ukuthi ithole imali, iqhube inhlelo zayo njengamaqembu alemali abalisela iFC Platinum, Ngezi Platinum, Manica Diamonds, Simba Bhora leScottland.
Kuminyaka eyisithupha eyedluleyo kumidlalo yePremier Soccer League iFC Platinum isithethe isicoco kane, iNgezi Platinum leSimba Bhora kanye.
