uMthunywa
Joel Ndlovu
ABAFUYILEYO sebekhuthazwe ukuba bahlole inkomo ezintsha ezilethwa epulazini zingakahlanganiswa lezinye ebezivele zikhona ukuze zingathelelani imikhuhlane.
Ekhuluma lentatheli kaMthunywa uMnumzana Kevin Moyo oyingcitshi kwezokufuya lokulima esabelweni seMatabeleland North uthe nxa abafuyi bengathenga inkomo ezintsha kuqakathekile ukuthi baqale bazihlole imikhuhlane njalo bazihlalise zodwa okwamaviki zingakahlanganiswa lezinye.
“Umfuyi kumele akuqakathekise ukuthi inkomo ezintsha azihlanganiswa lezinye zingakahlolwa imikhuhlane. Lokhu kwenziwa ngoba kungenzakala ukuthi ezintsha zibuye lemikhuhlane esibayeni zicine zithelela ezinye, kungakho-ke kumele zelatshwe nxa zilemikhuhlane zingakahlanganiswa lezinye ebezivele zikhona,” kulandisa uMnu Moyo.
“Inkomo ezintsha ziyahlaliswa zodwa okwamaviki amalutshwane, akukhethi ukuthi zilomkhuhlane kumbe azila. Nxa zihlaliswe zodwa umfuyi angakhangela ukuthi ziphila njani njalo nxa esebona ukuthi sezingaphilisana kuhle lezinye, sezingahlanganiswa ndawonye,” kutsho uMnu Moyo.
Uqhubekele phambili esithi zingaphangisa ukuhlanganiswa inkomo ezintsha lezindala ziyalwa zihlabane zicine zibulalana.
“Inkomo ezingajayelananga zingahlanganiswa ndawonye ziyaqala ukudelelana zilwe njalo kuyabe sekuyinto yansukuzonke. Zingahlala zisilwa kucina kusifa ezinye umfuyi alahlekelwe yinzuzo yakhe, ngakho-ke kuqakathekile ukuthi umfuyi akunanzelele ukuthi nxa kungavumi ukuthi zihlale zonke engazibambi ngamandla.
“Inkomo azidli okufanayo ngakho ezintsha kumele zijayele indlela ezinye ezidla ngayo lokudla okulingeneyo ezikudlayo,” kulandisa uMnu Moyo.
Uphethe ngokukhuthaza abafuyileyo ukuthi inkomo ingabulawa ngumkhuhlane othile kumele itshiswe kumbe igejelwe phansi enhlabathini ukuze ezinye zingabambi lowo mkhuhlane.
