uMthunywa
Joel Ndlovu
ABAFUYI benkomo sebekhuthazwe ukuba behlole inkomo ezintsha ezilethwa epulazini zingakahlanganiswa lezinye ebezivele zikhona ukuze zingathelelani imikhuhlane.
Ekhuluma lentatheli kaMthunywa uMnumzana Kevin Moyo oyincitshi kwezokufuya lokulima esabelweni seMatabeleland North uthe nxa abafuyi bethenge inkomo ezintsha beziletha epulazini kuqakathekile ukuthi baqale bezihlole imikhuhlane njalo bezihlalise zodwa okwamaviki amabili zingakahlanganiswa lezinye.
“Umfuyi kumele akuqakathekise ukuthi inkomo ezintsha azihlanganiswa lezinye zingakahlolwa imikhuhlane. Lokhu kwenziwa ngoba kungenzakala ukuthi ezintsha zibuye lemikhuhlane esibayeni zithelele ezinye.
“Ukuzihlalisa zodwa kwenzelwa ukuthi ngesikhathi zizodwa imikhuhlane ilakho ukuthi iphumele egcekeni, zelatshwe nxa zilemikhuhlane ethane andubana zifakwe ndawonye esibayeni.
“Ngesikhathi zihlaliswe zodwa umfuyi angakhangela ukuthi ziphila njani njalo nxa esebona ukuthi sezingaphilisana kuhle lezinye, sezingahlanganiswa,” kutsho uMnu Moyo.
Uqhubekele phambili esithi zingaphangisa ukuhlanganiswa inkomo ezintsha lezindala ziyalwa zihlabane zicine zibulalana.
“Inkomo ezingajayelananga zingahlanganiswa ndawonye ziyaqala ukudelelana zilwe njalo kuyabe sekuyinto yansuku zonke. Zingahlala zisilwa kucina kusifa ezinye umfuyi alahlekelwe yinzuzo yakhe, ngakho-ke kuqakathekile ukuthi umfuyi akunanzelele ukuthi nxa kungavumi ukuthi zihlale zonke ezingazibambi ngamandla.
“Inkomo azidli okufanayo, lokhu kutsho ukuthi ezintsha kumele zijayezwe indlela lezi ezinye ezidla ngayo lokudla okulingeneyo ezikudlayo,” kulandisa uMnu Moyo.
Uphethe ngokukhuthaza abafuyileyo ukuthi inkomo ingabulawa ngumkhuhlane othile kumele itshiswe kumbe igejelwe phansi enhlabathini ukuze ezinye zingabambi lowo mkhuhlane.
