uMthunywa
Thokozile Mbedzi
ABALIMI kundawana zonke zelizwe bakhuthazwa ukuba bakhe iziphala ezinkulu njalo bathenge imithi yokulondoloza izilimo zabo ngoba bezathola isivuno esikhulu lonyaka ngoba izulu libe linengi.
UDistrict Agritex Officer eBeitbridge kunhlanganiso yeAgritex uMnumzana Masauso Mawocha ukhuthaze abalimi ukuba baqalise ukulungiselela isivuno sabo ngokwakha iziphala lokuthenga imithi yokusivikela ukuze singatshabalaliswa zimpehlane kunye lezinye izinanakazana ezingaphambanisa isivuno.
UMnu Mawocha uthe abalimi kabakhe iziphala ezinkulu ukwenzela ukuthi bathole indawo yokufaka izilimo zabo endaweni eziqondileyo ezingeke zibaphambanisele isivuno sabo.
“Abalimi kundawana zonke zelizwe njengenhlanganiso yeAgritex sibakhuthaza ukuthi kabakhe iziphala eziqondileyo ezizagcina njalo zilondoloze isivuno sabo.
“Lokhu kuzenza bangalahlekelwa kubangelwa yibumanzi loba ukunethwa njengoba izulu lilinengi lonyaka,” kuchaza uMnu Mawocha.
Uqhubekele phambili esithi abalimi kumele njalo bathenge imithi yokulondoloza izilimo zabo ukuze impehlane lezinye izinanakazana zingatshabalalisi isivuno.
“Yisikhathi esiqondileyo kubalimi lesi sokulungiselela ukwenzela ukuthi kwabakhayo bakhe. Labo abadinga ukuthi bathenge imithi lakho kufanele kwenziwe ngasolesi isikhathi ukwenzela ukuthi nxa sekukhona okuhluphayo konke kube seduzane.
“Nxa imithi ingaswelakala abalimi bacina belahlekelwa yinzuzo yabo kukanti lonyaka abalimi bebezitshayele inala ngoba izulu linile indawo yonke.
Uphethe ngokuthi abalimi kumele bahle bathathe ithuba leli ukulungiselela kuseselesikhathi ukuze isivuno sabo sigcineke kuhle.
