uMthunywa
OWAYENGUMQEQETSHI weChelsea, Real Madrid leManchester United, uJose Mourinho usola ukudlalela emuva kakhulu kwaboPharoah lokukhathala kukaMohamed Salah ngokudliwa kwabo yiBafana Bafana emdlalweni we-last 16 ku-Africa Cup of Nations.
UMourinho osengumhlaziyi webhola kuRussia Today ukhale ngabadlali be-Egypt athe akakholelwa ukuthi bebelandela imlayo yomqeqetshi uJavier Aguirre, okhonjwe indlela ngemva komdlalo.
“Nxa uphethe ibhola, akumelanga ulokhe uliphindisela emuva. Leyo akusiyo imilayo ka-Aguirre. Lokhu kutshengisa indlela abadlali abacabanga ngayo. Abadlali be-Ningizimu Afrika bakhombise ukubekezela lokuhleleka. Ngakolunye uhlangothi, abe-Egypt baphoxile,” kutsho uMourinhlo kuliviki.
Ngemva kwalumdlalo i-Egyptian Football Association imemezele ukuthi u-Aguirre labasizi bakhe sebexotshiwe, lokuthi umongameli wayo uHani Abu Reidah usetshiyile isikhundla wacela labanye bakhe ukuthi bamlandele.
UMoh Salah ubonakale ehlihla esikaNandi ngemva komdlalo. UMourinho usole ukuthi ubetshengisela ukukhathala.
“Ngiyibukelile imidlalo adlale kuyo ngesizini edluleyo. Ukhathele kakhulu, lokhu kujwayelekile ngemva kokudlala imidlalo engu-60.
Kusenjalo, uThembinkosi Lorch weBafana Bafana uthe ngeke azifake ngenkani kusibanga saphezulu.
Umdlali lo nguye owahlohla ibhola elanqoba iGipite.
“Njengoba bengisebhentshini ngathola ithuba lokuthi ngizitshengisele, yikho engakwenzayo. Lokho akutsho ukuthi sengiphakathi.
Ngikholwa ukuthi kuzongenza umdlali ongcono lokhu. Akukho okusatshiwo nguBaxter kimi ngaphandle kwabasizi bakhe abangikhuthaza njalo ngokuthi angihlale ngilindile,” kutsho uLorch. — Ubulembu
