uMthunywa
Ethel Ncube
KULOSOBHUKU weDolo eMberengwa obanjwe xhaka lembanje kanye lezihlahla zakhona ngemva kokuba amapholisa etheleke esivandeni sakhe.
UMnumzana Dula Moyo ongusobhuku kule indawo zimkhalele kulandela ukufika kwamapholisa emzini wakhe ngemva kokuncwetshwa indlebe afica kulamanina ahlakulayo andubana acele ukuyabona okusesivandeni afika athola izihlahla zembanje.
Intatheli ixhumane lesinye isakhamuzi uNkosazana Saziso Ndlovu obike ukuba amapholisa athatha izihlahla zembanje azifica esivandeni sikasobhuku ahamba lazo.
uInspector Emanuel Mahoko
“Amapholisa afika ekhaya athola omama behlakula emasimini bacela ukuba bafuna ukungena esivandeni okuyilapho afica khona izihlahla zembanje. Izihlahla lezi azithwala amapholisa ahamba lazo,” kubika uNkszn Ndlovu
Uqhubekele phambili wathi amapholisa ahamba laye usobhuku.
“Amapholisa loba amthatha akazange alale enkambeni. Imbanje lezi usobhuku kade waqala ukuzilima ezithengisela abantu esiqintini yikuthi nje abantu babesesaba ukumbophisa njengoba engumkhokheli wesigaba,” kubika uNkszn Ndlovu.
Kusenjalo kudaba olufanayo kulenina elileminyaka engu-39 yokuzalwa uMarian Paradza elibanjwe lilezihlahla ezingu-34 zembanje emasimini omumbu elisezandleni zamapholisa.
Uthethwe ngamapholisa
UMthunywa uxhumane lesikhulumi samapholisa eMidlands uInspector Emanuel Mahoko oveze ukuba udaba olunjalo balwemukele.
“Indaba le siyitholile sithanda ukubonga uzulu ngokusihlomisa ngemibiko esincedileyo ukuze senelise izigilamkhuba,” kuphetha uInsp Mahoko
