uMthunywa
Nkosilathi Sibanda
AKUKAZE kube lamaqembu amanengi alwela ukuba yintshantshu yomncintiswano we-Ingwebu Tug-of-War, nanko lonyaka kuzadlala amaqembu angu-40.
Umncintiswano lo, uqhutshwa minyaka yonke ngesikhathi sombukiso weZimbabwe International Trade Fair (ZITF) ngoMgqibelo emini.
Ingwebu Breweries, okuyiyo esekela lumncintiswano, ibike ukuba ikhiphe iUS$11 500, okuyimali ezasetshenziswa ekuqhutshweni komdlalo lemivuzo yabanqobi.
Ekhuluma lentatheli yephephandaba likazulu, umaneja obona ngezokuthengiselana eNgwebu Breweries, u-Ayandiswa Maphosa uthe bazimisele ukuthi baqhubekele phambili ngokusekela iTug-of-War.
“Asibuyeli emuva kusekelo lwethu kumdlalo we-Tug-of-War. Sikhona njalo lonyaka, okuyisitshengiselo sokuthi siyinkampani etshisekela ukusekela ezemidlalo,” kutsho uMaphosa.
Ukuhlelwa kwamaqembu azadlala kwenziwe ngoLwesihlanu ngeviki edluleyo lapho obekuhlangene khona okaputeni bamaqembu, inkokheli zomdlalo leziphathamandla zenkampani yeZITF.
Umsekeli kamaqhuzu weZITF uStella Nkomo ubonge ukuzimisela kwenkampani yeNgwebu.
“Ubudlelwano bethu leNgwebu kulumdlalo buyakhula. Sinikeza isibongo sethu esikhulu kulokhu,” kutsho uNkomo.
Okumqoka lonyaka yikuphumelela kwamaqembu adabuka kumhlubulo ongezansi yelizwe okuyiwo asememethekise udumo lalumdlalo.
Iphephandaba likazulu kuliviki libukele amathimu elungiselela umcimbi wokudonselana intambo, osusiba ngumncintiswano othandwa linengi lalabo abajwayele ukungena eTrade Fair.
Iphephandaba likazulu likhulume lomunye wabadlali beqembu lekhansili yakoBulawayo obike ukuba bazimisele ukuthi bathathe inkezo.
Lonyaka abazanqoba kuhlandla labesilisa labesifazane kubikwa bazaphiwa imivuzo elinganayo.
UMaphosa uthe balokuthaba ukuba lonyaka kulamaqembu abomama amanengi.
Loba umdlalo weTug-of-War ususilela koBulawayo, abalandeli bomdlalo lo abasemalokitshini abakhulume loMthunywa baveze ukuthi bazayigcwalisa inkundla yeTrade Fair belande ukuyasekela amaqembu akulelidolobho.
