uMthunywa
Thokozile Mbedzi
KUQHAMUKE impi phakathi kwamadoda amabili kwesinye isitokofela esigabeni seMadzivhe eBeitbridge, nanko phela omunye ubhoboze omunye ikhanda ngelitshe ngemva kwalokho laye wacina ebhaxabulwa andubana osiwe.
Kubikwa uPride Mbedzi utshaywe ngelitshe ekhanda lahlephukela phakathi nguRemote Mlilo ngeviki ephelileyo ngeSonto kubangwa utshwala.
Kuzwakale ukuthi uCharles Ndou kunye loSoneni bebona ukuthi uMbedzi uselimele bangenele indaba le, balanda uMlilo bambhaxabula bethi uphambanisa ibhizimusi yabo emdlalweni wesitokofela andubana bamose emalahleni.
Elandisela uMthunywa uSobhuku omkhulu uJutas Mudawu uthe abafana laba balimazane ngendlela etshwaqisa umzimba.
“Ngizwa ubuhlungu ngendlela abafana laba abalimazane ngayo. Mina ngibabonele esibhedlela futhi basesimeni esibi kakhulu.
“Angazi ukuthi umdlalo lo ubuvele usenziwa ngaliphi njengoba khathesi kungavunyelwa amadili alabantu abanengi njengoba siphakathi kokulwisana leCovid-19 lapho abantu abangavunyelwa ukubuthana.
“UMlisa laye ubengibuza ukuba kungani bekulomdlalo lapho abantu abacine belimazana khona njengoba siphakathi kwesikhathi seCovid-19 njengoba kungamelanga kube lemidlalo enje. Ngikhuluma nje kusasa kuzakuyadingwa usobhuku wesigaba lesi kuxazululwe udaba lolu ukuze abantu bangaze bafaka umthetho ezandleni zabo,” kuchasisa uSobhuku uMudawu.
Uqhubekele phambili esithi uCharles loSoneni babhaxabula uMlilo ngoba sebethukuthelele ukuthi uphambanisa ibhizimusi yabo.
UMlisa wakulindawo uMnumzana Liberty Mleya ebuzwa ngodaba lolu uvumile wathi lwenzakele endaweni yakhe njalo ulesimanga ukuba lokhu kwenzakale njani khona abantu besalandela imithetho yeCovid-19.
“Ngilokudana okukhulu ukuba lokhu kwenzakale njani khona abantu besalandela imithetho yeCovid-19.
Ngikhulumisane lomkhulu wabosobhuku laba ukuba kuthathwe inyathelo lokuba kulungisiswe udaba lolu ngoba kukhanya sokulobudlwangudlwangu obenzakalayo kusobhuku lowu. Abalimeleyo basesimeni esibi,” kuphetha uMnu Mleya.
