uMthunywa
Wayne Ncube
ABALANDELI benguqu boqobo sebephume bathi bhadla bekhonona ngokudliwa kweqembu lamaWarriors ephuma ekuseni kumqhudelwano we-Afcon.
Kusolwe unozinti uElvis Chipezeze ngokuvuzisa kwakhe iqembu lisamukela amabhola amane eqandeni linqotshwa yisizwe seDRC.
Uxolise waguqa phansi uChipezeze ekhonale eGipite watshelwa kubi ngabalandeli.
Loba kunjalo, bakhona abavikele lumdlali bathi kudlise wonke umdlali obekuqembu lamaWarriors.
“Ngiyaxolisa ngamaphutha lokuyangisa engakwenzayo.
Ngixolisa kulizwe lonke lakubadlali labaqeqetshi,” kutsho uChipezeze ngoMvulo ekuseni.
Baveze konke abangakutsho ngalunozinti kulandela ukuxolisa kwakhe kodwa inhlanganiso yeZifa ithe ukudlala kweqembu ngokomuntu wonke ngakho wonke amaphutha kumele amukelwe njalo inguqu yesizwe iqhubekele phambili.
“IZimbabwe Football Association ithanda ukuxolisa kubo bonke abantu baseZimbabwe ababelandela iqembu lama Warriors ngokulahlekelwa lithemba bekhitshwa emqhudelwaneni weTotal Africa Cup of Nations eGipite,” kutsho iZifa.
Abalandeli abakhulume loMthunywa kuliviki babika ukuba bamadolo nzima, inhliziyo zibuhlungu nxa bekhumbula amabhola amane angena ethululeka egedini.
Okubuhlungu yikuthi kubhola likanobhutshuzwayo kugidwa kutshintshwana nanko iZimbabwe idliwa yi-DRC le ababeyinqobile ngaphambilini kulungiselelwa i-Afcon.
Iphephandaba likazulu libhode likhuluma labalandeli esitaladeni ukuthi bona bayizwa njani eyamaWarriors.
“Sibuhlungu ngesehlakalo lesi, besilethemba ukuthi abafana bethu bazazama okungcono kungasenani, abanengi balimele kumqhudelwano lo.
Bazame konke okusemandleni abo ukuthi bafike lapho abasifikise khona,” kutsho uLameck Temera umlandeli wamaWarriors ophinda asekele iBulawayo City kuligi yePSL.
UTeddy Ncube ongomunye wabacunuke kakhulu uthe umadolo nzima.
“NgeSonto saphela amandla umdlalo uphela, sasesithembele kulumdlalo ukuthi iZimbabwe loba izakhitshwa, kodwa iphume ilomklomelo.
Khathesi sizasekela iSouth Africa (iBafana Bafana) ngoba yiyo eseduzane eseleyo.Ngimadolo nzima nginje.”
Kusenjalo, umqeqetshi wamaWarriors uSunday Chidzambwa uthe nxa kumele atshiye umsebenzi, angeke aphikisane lakho.
Umqeqetshi lo wethule ukuba uyaxolisa laye njalo amaphutha enziwe liqembu ngawakhe.
Kwezinye inhlangothi, bakhona abathe kumele kudilizwe iqembu lonke kuqalwe kutsha.
