Nkosilathi Sibanda
UKUPHENDUKA kukaKhama Billiat kuqembu lamaWarriors sekwethuse umqeqetshi welizwe leKenya, osebike ukuba umdlali lo ulakho ukuthi abathwalise nzima mhla amazwe womabili edibana ngoLwesihlanu.
Umdlalo lo ngowomkhankaso we-Africa Cup of Nations (Afcon) womnyaka ozayo njalo uzadlalelwa enkundleni yeMandela Stadium, edolobheni leKampala, e-Uganda.
Umqeqetshi weKenya, u-Engin Firat uveze ukuthi usenanzelele ukuthi kuqembu leZimbabwe, umdlali ongahlupha enkundleni nguBilliat. Uthe umdlali lo kumele akhangelwe njalo usetshele abadlali bakhe ukuthi baqaphele yena nxa befuna ukuwunqoba umdlalo.
IZimbabwe leKenya zikuqula lika-J elilamazwe abalisa iCameroon leNamibia. UBilliat uphenduke kuleli esetshiye ukudlala eSouth Africa lapho ahlale khona iminyaka elitshumi.
UBilliat wayesethethe umhlala phansi kunguqu yamazwe, esekhethe ukuthi aqine ngokudlala kuligi yeCastle Lager. Ukufika komqeqetshi wamaWarriors omutsha, uMichael Nees kumkhuthazile lumdlali ukuthi aphenduke eqenjini.
UFirat uthe ukhathazekile ngokuphenduka kukaBilliat.
UKhama Billiat
“Iqembu leZimbabwe ayilazo inkinga, bonke abadlali bayo bakusimo esihle, bonke babuyile. Akucini lapho, ngitsho labadlali abangazange bafike phambilini. UKhama Billiat ngumdlali osezingeni eliphezulu njalo balomqeqetshi omutsha.
“Ulethuba lokuba phendukisa emdlalweni, ngakho bazabumba iqembu eliqinileyo, siyakwazi lokho. Kodwa siyalazi leliqembu futhi, ngakho-ke kuzaba nzima kakhulu, sizabona,” kutsho uFirat, ekhuluma phambili kwentatheli zeKenya.
Abadlali bamaWarriors abakuleli basuke ngeSonto. Labo abadlalela phetsheya bazahlangana labanye eKampala.
Iqula lamaWarriors:
Onozinti: Washington Arubi (Marumo Gallants), Marley Tavaziva (Brentford), Donovan Bernard (Chicken Inn)
Imvimbi: Gerald Takwara (Al Minaa SC), Brendan Galloway (Plymouth Argyle), Munashe Garananga (FC Copenhagen), Andrew Mbeba (Highlanders), Godknows Murwira (CAPS United), Emmanuel Jalai (Dynamos), Teenage Hadebe (Cincinnati)
Esiswini: Marshall Munetsi (Stade de Reims), Andy Rinomhota (Cardiff City), Jordan Zemura (Udinese), Walter Musona (Simba Bhora), Daniel Musendami (Marumo Gallants), Brian Banda (FC Platinum), Tawanda Maswanhise (Motherwell), Richard Hachiro (Ngezi Platinum Stars), Tawanda Chirewa (Derby).
Abagadli: Tino Kadewere (FC Nantes), Douglas Mapfumo (Polokwane City), Prince Dube (Young Africans), Obriel Chirinda (Ngezi Platinum Stars), Khama Billiat (Yadah)
