NguMsilisi Dube
KULENDODA ehlala elokitshini leMagwegwe West koBulawayo ebhaxabule umntanayo oleminyaka yokuzalwa engu-8 yaze yamephula ingalo kabili qede lapho yamkhiyela endlini.
Umsolwa uNkosilathi Moyo oleminyaka yokuzalwa engu-41 umiswe phambi komthethwandaba weWestern Commonage kuviki ephelileyo esetheswa icala lokulimaza umntanakhe.
Umtshutshisi kulelicala ubikele inkundla ukuba mhlaka 10 kuyonale inyanga umsolwa watshaya umntanakhe ngoba ephuze ukuphenduka emavinkilini.
Kubikwa umsolwa wathuma umamangala ukuba ayemthengela i-airtime emavinkilini aselokitshini leli kodwa kasazange waphenduka waziyela koyisekazi eLuveve.
Kuzwakale ukuba umsolwa wamdinga waze wayamfica koyisekazi ezidlalela nje engagqize qhakala.
Umsolwa kubikwa wafika wahudula umamangala wabuyela laye lapho afika wamtshaya ngemvubu umzimba wonke waze wephuka ingalo.
Ngemva kwesenzo lesi umsolwa wakhiyela umamangala ekamelweni okwehola elilodwa.
Kubikwa omakhelwane bezwa umamangala ehlaba umkhosi ngakho basebebikela amapholisa okwabangela ukuba umsolwa abotshwe.
Ebuzwa ngumantshi uMnumzana Maphios Moyo umsolwa ulivumile icala lakhe lokutshaya umamangala kodwa wala ukuba wayejonge ukumlimaza.
Umsolwa utholakale elecala lokutshaya umamangala ngokungekho emthethweni.
Ngemva kokuzwa ubufakazi lobu umantshi uqume ukuthi umsolwa ayepika ejele okomnyaka owodwa.
Umtshutshisi wecala leli bekunguMnumzana Mufaro Mageza.