uMthunywa
Nkosilathi Sibanda
UBUNZIMA bempilo yabadlali benguqu ngalesi isikhathi se-Covid 19 kubangele ukuthi umdlali weqembu leHwange uCraven Banda abulale indlovu nanko ubanjwe ebuthelele impondo zendlovu ezingu-8 esakeni kuliviki.
UBanda, oleminyaka engu-36 yokuzalwa uswele lapho engafihla khona ikhanda kulandela ukutholwa ngabomthetho ethwele inkalakatha yesaka lilempondo zendlovu lezi okucatshangelwa ukuthi wazithola ngemva kokubulula inyamazana le egangeni leHwange National Park.
Icala elibhekane lalumdlali kungenzeka ukuthi limhlalise ejele okweminyaka eminengi, okutsho ukuba angeke abalandeli bomdlalo bambone futhi enkundleni.
Kuphelile konke ngalumdlali ngoMvulo eselokitshini leNumber 5, ebanjwa ngamarenja lamapholisa esizwe, sekuvele umbiko wokuthi ulomxhaka wesaka ofukethe impondo.
Uphondo olulodwa lwendlovu lubiza imali eyedlule i$60 000 yase-Melika.
Amapholisa esabelweni seMatabeleland North akhiphe umbiko wokuthi uBanda ubanjwe xhaka elayitshe isaka lempondo enkomponi yeNumber 5 edolobheni leHwange.
Isikhulumi samapholisa eMat North uChief Inspector Loveness Makonese uthe uBanda usezandleni zabo.
“Mhlaka 24 kuNkwenkwezi kulomfakazi owachazela amapholisa ukuthi kulomsolwa ongabe elempondo zendlovu. Ngokuzwa lokho, iqula eligoqela amapholisa, amarenja awe-ZimParks alubhekisa eMakwika Village athola uBanda ehlezi esilindelweni samabhasi ethwele isaka,” kubika uChief Inspector Siphiwe Makonese.
