uMthunywa
Vusumuzi Ndlovu
Isihloko: Mambo
Umculi: Asaph featuring Tha Dawg & Fish McSwagg
UASAPH, (igama lokuzalwa nguTafadzwa Tarukwana), uqeda kunqoba isicoco seBest Hip-hop 2018 emavikini adluleyo kuma-RoilBAA, emveni komsebenzi wakhe awenze ngedlalade uTwenty Five (25). Uyaqhubeka esitshengisa ubungcitshi bakhe ngengoma entsha ayisunguleyo ethiwa Mambo.
UMambo yisihloko somsebenzi wakhe awuqoqa ukusungula lezinye ingoma kudlalade leEP yakhe esendleleni elokhu isacindezelwa eStudiyo.
Lingoma useyiphekele ividiyo, lapho abonakala ethakazelela isicoco sakhe njalo utshengisa esendaweni ezitshiyeneyo khonapha koBulawayo labangane bakhe bezikholisela okwelanga. Ekuqoqeni lingoma uhlanganise abakhandi ngoma uTha Dawg loFish McSwagg. Amajaha la lawo afake amachacho abo kamnandi besekela uAsaph.
UTha Dawg uyalandula ukuba indawo le bazothatha ubukhosi be-hip-hop, lapho athi kuye kufana lehlathi elingela mngcele. Ulimi olusetshenziswe lapha kakhulu yisiNgisi nguAsaph, lawo amajaha asekela ngendimi zakuleli, isiNtu le siShona. Lapha kudlawe ngomsindo wakulezinsuku we-trap, uhlangene lempondo ze-jazz kancane.
Thina-ke sithi halala mfana waseNorth End. Qhubeka uphakamisa ifulegi yakoBulawayo phezulu, wena Mambo!
