uMthunywa
Ethel Ncube
ZITHWELE amaphaphu ngezandla izakhamizi zeMasekela Line eTsholotsho ngemva kokuba esinye isalukazi esesihluphile ngokudla inyama zabantu abafileyo ebesesixotshiwe esigabeni sale semba phansi ukuthi ngeke sisuke kule indawo sodwa sitshiye abanye baso.
UMthunywa uzwe ukuthi uBeauty Moyo uselamacala amathathu okudla abantu abafileyo.
UNkszn Moyo umiswe edale lenduna uGampu ngenyanga edluleyo esetheswa icala lokuba ngumthakathi.
Indaba lezi kubikwa zivele ngemva kokuba umzukulu kamsolwa oleminyaka engu-9 ethe edlala labanye abantwana wezwakala esithi uzabadla okwenza omunye umzali oseduzane wadinga ukuzwisisa ukuthi kungani edlala labanye esithi uzabadla.
Ngemva kokubuzisiswa komntwana lo waveza ukuthi yena logogo wakhe bayadla abantu njalo inyama yabo imnandi ukwedlula eyenkukhu.
Intatheli ixhumane lenduna uGampu oveze ukuba izimuli ezazivezwe ngumntwana lo zabuya zazobika ukuba ugogo lo wabizwa enkundleni.
“Sambiza enkundleni ngemva kokuba umzukulu wakhe oleminyaka engu-9 eveze ukuthi yena logogo wakhe badla inyama kaNaJela bayikholisa. Umzukulu lo waphinda wathi omunye abazama ukumudla nguNdafuleni kodwa behluleka ngoba bemthola ehlezi phezulu kwengcwaba njalo ebadlepha,” kulandisa induna uGampu.
Induna iqhubekele phambili yaveza ukuthi uNkszn Moyo ebuzwa ngodaba lolu waqala wathi ucela inkundla imncedise kubizwe owafawafa ngoba yena kakwazi ukuthi nxa eloya uloya enjani kodwa waphinda wajika wathi ngeke axotshwe yedwa esigabeni bona bebanengi.
“UMaMoyo wathi elapha simbuza ngabantu okuthiwa wabadla wathi yena uNdafuleni uyapoka njalo bamthola ehlezi phezulu kwengcwaba lakhe,” kutsho induna uGampu.
Induna uGampu iphethe ngokuthi uNkszn Moyo bake bamxotsha kodwa wala ukusuka esigabeni.
“Mina vele umamalo kangisamfuni lapha esigabeni, kodwa wahamba emthethweni wayangimangalela lapho okwathiwa ukuloya akulabufakazi.
“Kungakho-ke uhlezi lapha esigabeni ngegunya leli,” kuchaza induna uGampu.
