uMthunywa
Vusumuzi Ndlovu
Idlalade: Majazana
Umculi: Madlela Sikhobokhobo
USEKELO lwenu babali bephephandaba lusikhukhumeza maviki onke. Njalo asikhathali ukulethulela ezitshisayo kuphephandaba lenu maviki onke, silamukela njalo kwesinye isahluko sohambo lomculo wethu.
Sithokozela njalo ukugcotshwa kukaMongameli wethu omutsha okwenziwe ngeSonto edluleyo lapho uSis’ Sandra Ndebele, uMzoe7 labanye abaculi beZimbabwe bejabulise usapho lwethu kulowomcimbi. Kuliviki sitshintsha igiya sihambe ngomdumo wetshibilika, phambili njalo sizwe ngezinye ezengqubelaphambili yezomculo kwelakithi ezisendleleni ezabaculi bakuleli.
Siqale ngokuhlaziya esikuzwa egudwini ukuba lendoda yehloka uMadlela Skhobokhobo isigamulele njalo elinye idlalade, uMajazana. Lelidlalade elisetshenzwe khonapha kwelakithi libanjwe ngumqondisi wohlonzi, u “Papa Joe” Maseko osebenza eseLuveve. Sizwe njalo ukuba uSkhobokhobo uthinta izigameko ahlangana lazo ngengoma zakhe ezilitshumi . Enye yazo ngeyentombi yakhe “uTryphine” ayilandela eMzansi, eyafika yamenzela imihlolo efike khona.
Kusenjalo, ekuphendukeni ezweni wadibana lo “Sibande” obezithi ngumZulu behlangana eGoli, wazothola ukuba ngowakithi sebesemngceleni weZimbabwe kodwa uhambo lwakhe alupheleli khonapho. Uthi nxa efika ngapha, lakho kulendaba ezingakapheli eziqonde yena ngqwa.
Ufika esiyadinga usizo ngezomoya lomkhuleko, athole umngane wakhe abakhule bonke nguye osengu mthandazeli/umphurofitha omkhulu esigabeni, uNathaniel. UDlelas athi mhlawumbe usefike kahle, kanti kabuzanga elangeni ngoba phela “kwezomoya akula bungane”. Laye kumele ame njengabanye khonapho alinde ithuba lakhe lokusizwa kudwendwe.
Phela eyamadoda kayipheli, okwatsho abeMzansi. Khumbula phela kumnyaka odluleyo, uMadlela waphenduka iqhawe lapha “enanka” uSaMamo, kanti wayesetheze olulenkume! Kukhanya waqala isigigaba esizakumlandela okwebhadi elingasuleki. Kungenani kukhanya badibene njalo loSaMamo. Ngethemba uDlela’s wayiphinda lendoda ngoba ngizwa bathi kwezwakala u“Sorry” ekucineni kwakho konke.
Kulelidlalade uthinta imbube, njalo lendaba ezingela mpendulo ezifana lokufa. UMsizKay laye ukhona lapho kwenye eyezothando, okukhomba ukuba kuleminye imidumo ekhona ngaphandle kwetshibilika kulidlalade.
UDlelas njalo usithembisa umabonakude emaduzaneni, lapho umphakathi uzokwazi ngoMajazana.
Ngethemba uyazizwela lawe ukuba kuloluju lwedlalade olulindelwe ukusungulwa nguSkhobokhobo kulimpelaviki, ozavakatshela abalaleli bakhe eGwanda .
Siphethe ngokuthi amhlophe ku “iSilo” uJeys Marabini osesebenze loOktopus, kudlalade elitsha uNtunjaMbili. Silamukela ngezandla zombili, njalo silethemba lokulicubungula kumaviki azayo.
Libe lempelaviki ejabulisayo babali!
