uMthunywa
Vusumuzi Ndlovu
Ingoma: Elliot
Umculi: Mzoe Seven
SIYALAMUKELA kuhlandla lethu lezokuzithokozisa maviki wonke, sisethula ezitshisayo lezenzakalayo kwezomculo. Kuliviki sihamba loMzoe Seven eveza izimanga kwabavuka ekufeni. UMzoe Seven uhleli ephezu kwamaqhinga kwezimanga ezenzakala emphakathini, siboniswa ngomsebenzi wakhe omutsha wengoma ethi NguElliot.
UElliot ligama elisukela kujaha owa “vuswa ekufeni” ngumphurofethi webandla leMzansi Afrika, okwaduma umhlaba wonke jikelele njalo kwadala lengxoxo kundawo zokholo lezomsakazo kwaze kwafika leMelika kuDaily Show kaTrevor Noah. UMzoe Seven ubhale lingoma echasisa ngomculo indlela azwisisa ngayo lesi sehlakalo esenzakalayo.
Ekumbuzeni ukuba kungani ekhethe ukusakaza ngaloludaba solulamaviki ludlule, uthe laye ubefuna ukuthinta ngodaba lolu ngengoma njengoba lwatshiya abanengi bebambe owangaphansi, abanye basala belombuzo ukuba liqiniso na ukuthi umuntu ngempela uyavuswa ekufeni. UMzoe uthe yena abantu kababe lobudlelwano loNkulunkulu okupheleleyo kodwa baqaphele njengokutsho kombhalo ongcwele ngoba sesiphila kunsuku zokucina.
Kulingoma uMzoe usebenzisa umdumo weGqom, okuba yiwo umdumo womgido owakulezinsuku njalo lokuthi kube lomnyakazo, loba loludaba luvusa imizwa ehlukeneyo. Lingoma ihamba levidiyo emfitshane, esike yangena ebulenjini kumakhasi afana labo Mzansi Extreme kuFacebook, Twitter, leWhatsapp. Ividiyo itshengisa uElliot esesinde ekufeni esenkonzweni labanye begida lingoma eyethulwa okusemthethweni kusasa. UMzoe uthi ividiyo yengoma le izaphuma kumaviki alandelayo.
Ekulungiseni lingoma usebenze lo Tomza, uDj Shakers, njalo ividiyo izakwenziwa yi- J-Cinematography kaJason Makara wakoBulawayo. Kathandanga ukusichazela okunengi ngevidiyo ngoba ethi ufuna kube samfihlo njalo uzayisungula okukamazivelela, abantu belibele kodwa uMzoe uzwakale esithi sebeyiqalile kuyonale iviki ukuyilungisa.
Lesisehlakalo sokuvuka kukaElliot ekufeni senze abanye abaculi labahlekisi abafana loNceku labo benza amavidiyo besibonisa eyabo indlela abazwisisa ngayo loludaba. Lakhathesi abanengi silokhe sizibuza imibuzo ngabafundisi lezimanga esizibona kubo kulezi izikhathi ezinzima esesiphila kuzo.
Abantu badinga impendulo yemibuzo eminengi, lengozi ezinengi ezenzakalayo njengalesi eseCyclone Idai esiqede abantu satshabalalisa lokudiliza izinto ezinengi lezimpilo zabantu abanengi. Asiqineni ngemithamdazo, njalo sisithi alwehlanga lungehlanga kubo bonke abalahlekelwe yizihlobo labangane.
