uMthunywa
Bongani Ndlovu
BONKE abalezivande zemibhida bakhuthazwa ukuba baqale ngokuthela umquba ezivandeni zabo ngaphambi kokuba balime imibhida yabo.
UMthunywa ukhulumisane loNkosikazi Patience Sibanda ongumlimi obike ukuthi esikhathini esinengi okwenza imibhida ingakhuli kuhle yikuthi abantu bayabe belime nje emhlabathini ongelakudla.
“Okwenza uthole imibhida ingakhuli ngendlela yikuthi uyathola umuntu ehlanyele emhlabathini owome qha ongelakho ukudla futhi,” kuchaza uNkkz Sibanda.
Uqhubekele phambili esithi umquba akusiyonto edulayo ngoba uthatha owenkomo, owenkukhu kanye lotshani obomileyo konke, nje kwenza umquba omuhle kakhulu uzifakele esivandeni.
Ngalokhu-ke imibhida yakho iba mihle kakhulu lamahlamvu akhona aba makhulu.
Ubuye wachaza njalo ukuthi abalimi abanengi bayathi nxa sebefake lowo mquba balima imibhida yabo bamane bakhohlwe lokuwuthelela bengazi ukuthi imibhida elomquba ifuna amanzi amanengi.
“Uyathi esewufakile-ke umquba wakhe umuntu eselimile lombhida uyamane alibale lokuthelela leyo mbhida, lokhu kwenza ingakhuli futhi ngoba imibhida elomquba ifuna amanzi amanengi ukuze ikhule kuhle,” kuchaza uNkkz Sibanda.
“Imibhida elomquba ingaswela amanzi eneleyo iyaphangisa ukubuna ngakho amanzi amanengi ayadingeka,” kuphetha Nkkz Sibanda.
Ugcizelele ngokuthi imibhida iyisitshebo esihle njalo esithi singalinywa kuhle siba lenzuzo enhle kumlimi.
“EZimbabwe akula muzi ongakaze udle umbhida, lokhu kutshengisa ukuthi umkambo wemibhida ubanzi kakhulu ngakho labalimi badinga ukuthi bawuhlakaniphele lowo mkambo njalo bawenze ngendlela elenzuzo phakathi,” kuphetha uNkszn Sibanda.
