uMthunywa
Nkosilathi Sibanda
UKUVULWA kwenkundla zomdlalo kanobhutshuzwayo kuligi yeCastle Lager kuzathi ukuqeda isizungu ebesesihlasele abathandi labalandeli bomdlalo, asebelezinyanga ezimbalwa bengalugxobi enkundleni.
Castle Lager Premier Soccer League
Abasekeli bomdlalo baveze ukuthi sebelinde kwenela ukubona abadlali babo bengena enkundleni.
Kusukela ngoMpalakazi, besekubukelwa ibhola laphetsheya kuphela, okuyikho okuzenza impelaviki le ibengenkulu ngoba ibhola seliphenduke ekhaya. Ngemva kwamaviki edlula itshumi elungiselela, amaqembu lawo azwakala esezimisele ukuthi akholisise uzulu, kulumdlalo othandwa ngabanengi. Kuyo yonke imidlalo ekhona, amehlo azakuthi nhlo kumaqembu azadlala koBulawayo. IHighlanders inxuse iZPC Kariba eBarbourfields ngeSonto, okuza kuba ngumdlalo omkhulu koNtuthu ogqiba impelaviki.
Okumqoka ngalokhu yikuthi kuzaqeqetsha uMadinda Ndlovu kuHighlanders nanko umqeqetshi omkhulu uBrito Baltemar ulubhekise ePortugal lapho okubikwa ulande ukuyathapha olunye ulwazi ngokuqeqetsha, okwesikhathi esifitshane.
Okuhlabusa ngokuphatha kukaMadinda yikuthi uphiwe umlandu lo ngemva kweviki eqhatshiwe. Loba iHighlanders ingazange ifune ukuthi bhadla, isikhulumi sayo uNozibelo Maphosa utshele intatheli ukuba uBrito uzabe engekho, kodwa kazange esacacise ukuthi ibhentshi labaqeqetshi limi njani.
“Umqeqetshi usuka kuliviki esiya ePortugal lapho alande ukuyalungisisa isithupha sakhe se-Uefa Pro. Sizabika ngesimo sabaqeqetshi bethu isizini ka2023 ingakaqalisi,” kutsho uMaphosa ngoLwesibili emini.
“Silungiselele saphelela. Imidlalo siyilindile njalo abadlali bakusimo esihle.”
UMadinda ulakho ukuthi ayikhuze eyedwa ebhentshini, nanko omunye wabasekeli bakaBrito wanyakenye uJoel Luphahla, kavunyelwa ukusondela ebhentshini.
Komunye umdlalo ozabe ukoBulawayo, iHwange idlala leDynamos, enkundleni yeBarbourfields ngoMgqibelo. Iqembu lezimbamgodi lizabe liqala ukuvula isizini lisenkundleni engaphandle kwekhaya layo. Okwenza kubenje yikuthi inkundla yeColliery isalungiswa ngoba yangconwa yinhlanganiso yeFirst Instance Body, engaphansi kwePremier League.
Ukudlala koBulawayo akusonkinga enkulu kuHwange ngokutsho kukaKhumbulani Mbano, umqondisi weqembu.
“Okwenza sibuye koBulawayo yikuthi inkundla yethu isalungisiswa ukuthi ibekubanga elifunwa yiPSL. Kodwa, njengoba sijwayele ukudlala koBulawayo, akusoze kusihluphe.”
Nansi imidlalo yonke:
NgoMgqibelo: Bulawayo Chiefs v Ngezi Platinum (Luveve), Hwange v Dynamos (Barbourfields), Sheasham v Chicken Inn (Mandava), Simba Bhora v FC Platinum (Mandava)
NgeSonto: Highlanders v ZPC Kariba (Barbourfields), Triangle v Herentals (Gibbo), Caps United v
Manica Diamonds
NgoMvulo: Yadah v Greenfuel (National Sports Stadium, 12PM), Cranborne v Black Rhinos (National Sports Stadium, 3PM)
