uMthunywa
Joel Ndlovu
ABALIMI sebekhuthazwe ukuba behlise inani labantu abangena lapho okuhlanyelwe khona izilimo ngoba sekungaba lokumemetheka komkhuhlane we-Covid-19 ebantwini lasezilinyweni.
Ekhuluma lentatheli kaMthunywa uMnumzana Mike Rugowo oyincitshi kwezokulima esabelweni seMatabeleland North uthe abalezivande emalokitshini lapho abalima khona ikakhulu imibhida lamatamatisi kumele bengavumeli abantu bangene lapho abahlanyele khona ngenxa yomkhuhlane lo okhona.
“Umhlaba wonke uhlaselwe ngumkhuhlane we-Covid-19 ngakho-ke kuqakathekile ukuthi abalimi behlise inani labantu abangena lapho abahlanyele khona izilimo zabo ngoba sekungenzeka ukuthi umuntu olomkhuhlane lo, angene lapho aqale ukubambabamba amahlamvu embhida lamatamatisi etshiye igcikwane leli ezilinyweni,” kuchaza uMnu Rugowo.
“Ezivandeni lezi kuminyene kakhulu njalo nxa umuntu ehambahamba uyabe ethinta isilimo ngempahla zakhe. Omunye umuntu usengangena esivandeni ethwele igcikwane leli ngempahla zakhe awutshiye esivandeni ngokuhamba ethintathinta izilimo ngempahla.
“Kubalulekile ukuthi inani labantu elingena ezivandeni lezo lehliswe kungene abanikazi kuphela njalo labanikazi kumele behlanze izandla zabo ngemithi ehleliweyo eyokubulala amagcikwane bengakangeni phakathi.
“Isilimo singakhiwa kumele sigeziswe kakhulu singakathengiswa njalo singakaphekwa. Ngesikhathi lesi kumele abantu bezinakekele kakhulu,” kulandisa uMnu Rugowo.
UMnu Rugowo uqhubekele phambili esithi ayisiwo wodwa umkhuhlane okumele bewukhangele kumele beqhubeke befafaza imithi eqeda imikhuhlane lezibungu ezibulala izilimo.
“Abalimi kumele bengakhangeleli ukulwa lomkhuhlane we-corona kuphela kodwa beqhubeke befafaza imithi yokubulala izibungu lemikhuhlane ehlasela izilimo zabo ngoba bengekela bazalahlekelwa yinzuzo yabo.
UMnu Rugowo uphethe ngokukhuthaza abalimi ukuthi beqhubeke ngokulima.
“Abalimi kumele baqhubeke ngokulima ngoba abantu kumele bethole okokudla. Bengavumeli umkhuhlane we-Corona ubulalise abantu ngendlala elizweni. Abalima emalokitshini benza kuhle ngokuthengisa okokutshebisa okunjengombhida lamatamatisi ezindlini zabo,” nguMnu Rugowo lowo.
