uMthunywa
Thando Dube
ABALIMI bemaphandleni bakhuthazwa ukuthi bakhe izambuzi ngoba ingcekeza yabantu yangaphandle iyingozi kumpilakahle yezifuyo.
Kubikwa emaphandleni kulemizi engelazambuzi ngakho abantu bacina besebenzisa iganga okucina kubangela ukuthi izifuyo zidle ingcekeza leyo zicine zigula.
USobhuku kaWadi 1 eMagedleni eGwanda uMnumzana Patrigde Ndlovu ukhulume loMthunywa ekhalaza ngokusweleka kwezambuzi esigabeni sakhe.
“Lapha eMagedleni ikhona imizi engela zambuzi ngakho ingcekeza yabantu le icina idliwa yizifuyo zethu.
Lokhu kubangela izifo enkomeni okwenza sicine silahlekelwa yinzuzo esiyikhangeleleyo.
Ubuye waxwayisa izakhamizi ukuthi zizame ngakho konke okusemandleni azo ukuthi zakhe izambuzi ukuze kuvikelwe imikhuhlane ezifuyweni zabo.
“Kumele sibambane njengezakhamizi zalapha sakhe izambuzi ukuze sihlanze isigaba sethu ngoba izifuyo zicina zisidla utshani ndawonye lengcekeza yona engalunganga kuzifuyo zethu, sesingalahlekelwa yizifuyo sezibanjwe yimikhuhlane ngenxa yokudla ingcekeza,” kuchaza uMnu Ndlovu.
Uthe ulesifiso sokuthi abantu bazwisise ngokuqakatheka kwezambuzi.
UMthunywa uphinde wakhulumisana loDokotela Khumbulani Sibanda oveze ukuthi kuliqiniso ukuthi inkomo zingadla ingcekeza yabantu ziba lomkhuhlane we-beef measles.
“Inkomo ingadla ingcekeza yomuntu ohlaselwe ngamawemusi esiswini ibanjwa ngumkhuhlane we-beef measles. Umuntu olamawemusi esiswini sakhe engenza ingcekeza yakhe egcekeni izifuyo ziyenelisa ukudla amaqanda amawemusi la ngesikhathi zisidla utshani okucina kubangela ukuthi zithathe lumkhuhlane ocina uhlasela ikakhulu imihlathi, ulimi lenhliziyo yenkomo.
“Umkhuhlane ofana lalo uyatholakala njalo engulubeni njalo ubizwa ngokuthi yi-pork measles.
“Umkhuhlane lo mubi njalo ngoba labantu bengadla inyama yesifuyo esihlaselwe ngumkhuhlane lo labo bayawubamba ngakho akulunganga ukuthi abantu benzele ingcekeza egangeni,” kuphetha uDkt Sibanda.
