uMthunywa
Joel Ndlovu
ABAFUYILEYO sebekhuthazwe ukuba bavikele inkukhu emkhuhlaneni we-quail ngoba uyingozi njalo ulakho ukuphambanisa inzuzo yabo.
Ekhuluma lentatheli kaMthunywa uNkosikazi Agnes Ndebele oyincitshi kwezokulima lokufuya esabelweni seMatabeleland North uthe umkhuhlane lo uyingozi ngoba uyabulala inkukhu njalo uthelelwana lula.
“Umkhuhlane we-quail uyathelelwana njalo ulakho ukuthanyela isilugu sonke du, kungakho-ke nxa kulenkukhu egulayo kumele yehlukaniswe lezinye,” kutsho uNkkz Ndebele.
“Inkukhu ezilomkhuhlane lo zibonakala ngokuphela amandla njalo kwesinye isikhathi azimi, ziyabe zihlezi phansi ngenxa yokuthi ziyabe zingelamandla. Ziyaphathwa njalo ngumkhuhlane wesihudo kuthi insiba zazo ziyakhithika,” kulandisa UNkkz Ndebele.
Uqhubekele phambili esithi abafuyi balakho ukulwisa ukufa kwenkukhu ngokusebenzisa imithi ebalisa i- Bacitracin le Penicillin ukulwisa lowu mkhuhlane.
“I-Bacitracin le penicillin yimithi eqakathekileyo okumele isetshenziswe ngabafuyi nxa inkukhu zabo sezihlaselwe ngumkhuhlane we-quail.
“Nxa usebenzisa i-bacitracin ukwelapha inkukhu zakho, kumele uyifake ekudleni kwalezo ezigulayo njalo lasemanzini okunatha, njalo ilakho ukuzwa ngcono ngemva kwamaviki amabili kodwa ungabona ilokha igula usungasebenzisa i-penicillin,” kutsho UNkkz Ndebele.
Uphethe ngokuxwayisa abafuyi ukuthi bahlanze izandla zabo bengakabambi inkukhu zabo.
“Abafuyi bengakabambi inkukhu kumele bahlanze izandla zabo ngoba sekungenzeka ukuthi bathwale umkhuhlane ngezandla zabo bacine bethelela inkukhu ngakho ke kuqakathekile ukuthi bageze izandla ngesepa langemithi ehleliweyo”.
