uMthunywa
Joel Ndlovu
ABAFUYILEYO sebekhuthazwe ukuthi bavikele imbuzi zabo kuzibungwana zangaphakathi ngoba ziyingozi njalo zilakho ukuphambanisa inzuzo yabo.
Ekhuluma lentatheli kaMthunywa uMnumzana Ntandoyenkosi Ndhlovu onguAgronomist kunkampani yeWorld Shakers Investments uthe ama-roundworm yiwo agcwele kakhulu njalo ayingozi kungakho abalimi kumele bawalwise kuse masinya.
“I-roundworm itholakala kakhulu emathunjini amancane njalo iyamunya igazi kwenze isifuyo siphele amandla. Nxa umfuyi engekela ukulwa lawo ngemithi yakhona ayazalana acine esiba manengi okungabangela ukufa kwesifuyo,” kutsho uMnu Ndhlovu.
“Imbuzi ehlaselwe yilesi sinanakazana uyayibona loba imile ukuthi ayilamandla njalo le-protein emzimbeni iyehla kakhulu kumbe ife, kwesinye isikhathi uyithola ingadli kuhle uyibone sicakile.
“Kuqakathekile ukuthi umfuyi ahlale evule amehlo ekhangele izifuyo zakhe ngoba izinanakazana lezi ziyayiqeda imbuzi,” kutsho uMnu Ndlovu.
Uqhubekele phambili esithi i-Coccidia yisinanakazana esibulala ngokudla ingaphakathi yamathumbu amancane embuzi.
“I-Coccidia iyingozi ngoba iyadla ingaphakathi yamathumbu icine isenza imbuzi ibe lomkhuhlane wesihudo njalo ihlale isebuhlungwini. Lokhu kwenza yehle njalo lesisindo sayo.
“Ukuze umlimi enelise ukulwisa izinanakazana lezi kumele angaminyanisi izifuyo zakhe ngoba zilakho ukuthelelana njalo kumele aphe izifuyo zakhe amanzi ahlanzekileyo angela ngcekeza, lokudla kumele aziphe okuhlanzekileyo ngoba izinanakazana lezi zingena ngomlomo,” kulandisa uMnu Ndlovu .
Uphethe ngokuxwayisa njalo abafuyi ukuthi bangasebenzisi imithi ebizwa ngokuthi yi-sulfa drug le anthelmintics ukulwisa izinanakazana lezi.
