uMthunywa
Joel Ndlovu
ABALIMI sebekhuthazwe ukuthi bavikele ihanyanisi emikhuhlaneni efana le-Downy Mildew le Black Smut ngoba iyabulala isilimo umlimi alahlekelwe yinzuzo yakhe.
Ekhuluma lentatheli kaMthunywa uNkosikazi Agnes Ndebele oyingcitshi kwezokulima esabelweni seMatabeleland North uthe umkhuhlane we-downy mildew ngumkhuhlane ogcweleyo njalo ubonakala kakhulu ngesikhathi somqando kodwa lanxa kutshisa ubakhona.
“Ihanyanisi nxa ingahlaselwa ngumkhuhlane lo uyibona ingasakhuli lamahlamvu ayo aphenduka abe lithanga umbala njalo icina isifa.
“Umkhuhlane lo ungahlasela isilimo uyahle usale enhlabathini ngakho-ke umlimi kumele aqede umkhuhlane enhlabathini kuqala engakahlanyeli enye ihanyanisi ukuze avimbe ukuthelelana komkhuhlane lowu,” kutsho uNkkz Ndebele.
“Ukuze umlimi alwe lomkhuhlane lo kumele ahlanganise ama-gram amabili eDithane M-45 le litha eyodwa yamanzi abesefafaza kathathu ngelanga okwamalanga alitshumi.
“Umlimi usengafafaza lenhlabathi ukwenzela ukuthi aqede umkhuhlane lo njalo kumele ahlale ewuphendula,” kulandisa uNkkz Ndebele.
Uqhubekele phambili esithi umkhuhlane we-black smut ngomunye umkhuhlane obakhona kakhulu ngesikhathi somqando njalo uyingozi.
“Ihanyanisi ehlaselwe ngumkhuhlane lo ibonakala ngamachathachatha lemzila emnyama emahlamvini ayo. Esikhathini esinengi ihanyanisi iba lothuli olumnyama lapho okulamachatha amnyama khona.
“Ukuvikela lo umkhuhlane akumelanga umlimi ahlanyele ihanyanisi yodwa okweminyaka emine ensimini inye, kumele atshintshanise izilimo. Nxa kungatholakala ihanyanisi elomkhuhlane lowu kumele ikhitshwe itshiswe. Intanga zehanyanisi ezifakwe imithi yizo okumele zihlanyelwe njalo imithi umlimi angayifaka entangeni yi- Captan kumbe i-Thiran,” kutsho uNkkz Ndebele.
Uphethe ngokuthi abalimi kumele bazifundise ukugeza izandla nxa bengakabambi ihanyanisi yabo lanxa beqeda kuyibamba ukwenzela ukuthi bengatheleli izilimo imikhuhlane.
