uMthunywa
YiNtatheli kaMthunywa
UMANGOYE uyasola ngenyathelo elithethwe yinhlanganiso yeZifa yokususa umdlalo wamaWarriors lesizwe seBotswana enkundleni yeBarbourfields ngoba kuthiwa izibane zalinkundla azisebenzi.
Kuze kwavela umbiko emahofisini eConfederation of African Football (Caf) ukuthi izibane zeMagumeni angeke zakhanyisa kulumdlalo obekumele uqhutshwe ebusuku mhlaka 15 kuLwezi. ICaf ixwayise iZifa ukuthi lumdlalo womkhankaso we-Africa Cup of Nations udlalelwe eHarare.
Ziphenduke zaba mnyama inhliziyo zabathandi bebhola lenyawo koBulawayo lakundawo eziseduzane ngaleli nyathelo. Bayasola abalandeli, bekhalaza ngokuthi kungani kungalungiswanga okonakeleyo ngezibane zeBF.
Abanikazi benkundla, ikhansili yakoBulawayo bahlalela izandla besazi ukuba kulenkinga. Kubonakele ukuthi bonke abalesandla ekulondolozweni kwesakhiwo seBF bayayekethisa ngoba lalapho iqembu leHighlanders lifuna ukudlala leChicken Inn ebusuku, kwabikwa ukuba intambo zamagetsi zatshontshwa.
Izibane zalinkundla zaphanyekwa kakutsha ngomnyaka ka-2014 kumidlalo yabasakhulayo eye-African Union Sports Council Under-20 Youth Games. Kusukela lapho bekusaziwa ukuthi ibhola lingadlalwa lasebusuku. Iqembu labesifazane elama-Mighty Warriors langqikilana lamanye kumqhudelwano weCosafa Women’s Championship kudlalwa ebusuku kulinkundla.
Inhlanganiso yeZifa ithumele iphephandaba likazulu umbiko wokuthi ikhansili yakoBulawayo, iBCC, ithe izibane zeBF azisebenzi.
“Kulandela ingxoxo esibelayo lekhansili yakoBulawayo, sithole ukuthi ikhansili ayilasiqiniseko sokuthi izibane zizakhanyisa ngendlela efaneleyo mhla womdlalo,” kutsho iZifa.
“Ngenxa yalokhu, iCaf icebise ukuthi umdlalo lo uqhutshwe eNational Sports Stadium ukwenqabela ukucitsha kwezibane okungadala ingozi empilweni zababukeli, abadlali labaphathi bomdlalo.”
Ihofisi yezokukhitshwa kwembiko kuZifa ekhokhelwa nguXolisani Gwesela ithe inhlanganiso le kuzamele incenge iCaf ukuthi umdlalo uqhutshwe emini, kwehlula.
Kubikwa iCaf iqoqe ukuba yonke imidlalo yomkhankaso we-Afcon ka-2021 idlalwe ngehola lesithupha ntambama.
“Siyaxolisa kubathandi bebhola bonke abakoBulawayo lakundawo eziseduzane.
“Inkokheli zeZifa zizimisele ukuthi kube lemidlalo enkundleni yeBarbourfields. Umdlalo olandelayo uzakuba ngesikhathi semini kulinkundla. Sizimisele ukutshintshanisa inkundla kumidlalo ukuze abalandeli basekele iqembu mathupha.”
Ngemva kweBotswana, amaWarriors azadlala leZambia.
Kusenjalo, ezibuhlungu azipheli kunhlanganiso yeZifa nanko phela ibika ukuba ayilamali yokonga amaWarriors kumidlalo le.
IZifa ithe idinga i$US200 000.
UPhillemon Machana osabambe isikhundla sikamsekeli kamkhokheli uthe imali le igoqela indleko zehotela, ukuhamba, iholo labadlali ukudla lokunathwayo.
“Sihlala sikutsho ukuba iZifa idinga usekelo. Sinxusa loba ngubani ukuthi asincedise ngoba lo ngumsebenzi wesizwe.”
