uMthunywa
Ethel Ncube
KULENDODA yesiqintini seKwayikwayi eSilobela etshiye izakhamizi zitshwaqe umzimba kulandela ukuzibophela amahola ekhanda iziqhumise isola ukuthi kungani i-small house sayo sithe kayibuyele kumuli yayo.
Indoda le, uIsaac Shumba eleminyaka engu-31 kubikwa iziqhumise ikhanda eduzane lenye i-tuckshop esemavinkilini aziwa ngokuthi kukoMahari, ngaphansi kwenduna uMalisa eSilobela kuviki ephelileyo.
Kuzwakale ukuba uShumba wathi efika lapho okuhlala khona idlalicatsha lakhe, lathi kabuyele kumkakhe yikho ukuzibophela amahola ekhanda andubana aziqhumise ngoba engafuni ukubuyela emzini wakhe.
Umfanekiso uthethwe ku 123RF
UMthunywa uzwe ukuthi ngesikhathi esenza lokhu uShumba abantu ababezama ukumbamba wayebathembisa ukubagwaza ngengqamu.
Kubikwa walumathisa amahola la esevulandini le-tuckshop yalapho okwaku-small house sakhe okwabangela ukuthi ikhanda lihle lidubuke.
Ezinye incezu zomzimba zathwalelwa emotsha yesibhedlela seSilobela.
UMthunywa uxhumane lomele isikhulumi samapholisa eMidlands, uAssistant Inspector Ethel Mukwende oveze ukuba udaba lolu sebelwamukele.
“Amapholisa axwayisa uzulu ukuthi kungaba lokungazwani bazame ukulungisisa ingxabano zabo ngokuthula kumbe badinge omunye umuntu wesithathu ongabaxazulela udaba lwabo.
“Ukulwa kucina kubangela ukulahleka kwemphefumulo obungavikeleka,” kuphetha uAsst Insp Mukwende.
