Uzinikele ‘umuntu omnyama’

17 Oct, 2019 - 00:10 0 Views
Uzinikele  ‘umuntu  omnyama’ UKaitano Tembo

uMthunywa

UFUNA ukuhamba ezinyathelweni zabaqeqetshi abahlale iminyaka kuSupersport United umqeqetshi, uKaitano Tembo, ozibule ngenkezo yeMTN8 ngempelaviki edluleyo.

UTembo odabuka kweleZimbabwe, ufike kuSuperSport esengumdlali eminyakeni engu-20 edluleyo. Uqeqetshwe ngabaqeqetshi abahlukeneyo okukhona kubo loPitso Mosimane.

Emuva kokuphanyeka izicathulo zenguqu, uTembo wangena kuhlelo lokufundela ubuqeqetshi engaphansi kweqembu leli lapho aqalisa khona engumsekeli wabaqeqetshi abatshiyeneyo anduba aphiwe lumsebenzi asekuwo.

Ekuqaleni kwesizini edluleyo uTembo unikwe isikhundla sokuqeqetsha ngokuzimela, wasayiniswa ikhontileka yeminyaka emibili. Lokhu kutsho ukuthi iyaphela ekupheleni kwesizini ka-2019/2020.

Uthe ufuna ukuyiqeqetsha isikhathi eside iSuperSport njengabaqeqetshi abamendulelayo. UMosimane uqeqetshe iSuperSport kusukela ngo-2001 kusiya ku-2007. Ithathwe nguGavin Hunt ngo-2007 wayitshiya ngo-2013.

“Nxa usakha uyafuna ukuhlala isikhathi eside. Ngilesikhathi eside ngilapha eqenjini futhi ngifuna ukuqeqetsha isikhathi eside. Ngaphandle kwalokho kubalulekile kimi ukuqhubeka ngokusebenza nzima. Lokho kunganginika ithuba lokuhlala lapha isikhathi eside.UPitso uhlale lapha iminyaka eyisithupha ngoba ubesenza kahle. Wakhe isisekelo esiqinileyo. UGavin Hunt wenze okufanayo, uhlale isikhathi eside. LakuStuart Baxter kwenzeke okufanayo. Ngifuna ukulandela ezinyathelweni zabo,” kutsho uTembo.

Kubaqeqetshi abakhona ku-Absa Premiership okwamanje, nguTembo kuphela osehlale isikhathi eside eqenjini elilodwa. Kuqembu leSuperSport useqeqetsha abadlali abadlule ezandleni zakhe emazingeni aphansi okukhona kubo uTebogo Mokoena, Sipho Mbule loRonwen Williams.

“Kimi akukaze kube ngendaba yeminyaka esengiyihlalile. Kuhlale kungeqembu. Ngisebenzela iqembu. Ngihlale ngizama ukugxila eqenjini ngoba banengi abenza umsebenzi omkhulu ekusitheleni. Akukho ngomuntu oyedwa. Ngiyakubonga kakhulu usekelo engikutholayo kubo lakuwonke umuntu oseqenjini,” kutsho uTembo. —Ubulembu

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds