YiNtatheli kaMthunywa
IZAKHAMIZI zedolobheni leChegutu zisele ziqunywe imilomo ngoLwesibili kuyonale iviki ngemva kokuba indoda eleminyaka engu-28 yokuzalwa yendaweni le izisike isisu ngengqamu savuleka, amathumbu aphuma egcekeni, yasisifa.
Kubikwa wenze umhlolo lo ethi ufuna ukukhipha umangoye osesiswini amginyileyo.
UBlessing Mudimu okubikwa ubegela abantu njalo enguwindi endaweni yamabhizimusi eChegutu kubikwa ubethatha okudakayo okugoqela uMutoriro le mbanje ayekuthengisela labantu.
UInspector Ian Kohwera oyisikhulumi samapholisa eMashonaland West ugcizelele ngendaba le.
“Indaba le eyisimanga yenzakale ngoLwesibili eChegutu lapho uBlessing Mudimu obehlala ku T11 elokitshini leChegutu okubikwa uthethe ingqamu waqala ukuzisika isisu sakhe esithi uginye umangoye afuna ukumkhipha esiswini.
“Wazisika abantu bekhangele waze wakhipha amathumbu phandle ezibopha inyawo ngawo,” kutsho uInsp Kohwera.
Uthe amazwi endoda le okuthi uginye umangoye ethusa uzulu.
“Indoda le sinakanela ukuthi ingabe ibisilomkhuhlane wengqondo ngendlela ebisenza ngayo. Wabotshwa ngamapholisa ngemva kokulwisana laye wasethwalwa yi-ambulensi wasiwa esibhedlela seChegutu lapho edluliselwa eParirenyatwa Group of Hospitals kodwa wasesifa esencediswa,” kutsho uInsp Kohwera.
Ababona indoda le izisika bathe besaba ukumbamba ngoba ebethusela ngengqamu ayelayo.
UInsp Kohwera ukhuthaze uzulu ohlala labagula umkhuhlane wengqondo ukuthi bahambe labo ezibhedlela ukuze bayehlolwa lokubona ukuba bayanatha amaphilisi abo.
