Uncategorized

Uzibophele otholakale elempahla ezitshontshiweyo

20 Jun, 2024 - 00:06 0 Views
Uzibophele otholakale elempahla ezitshontshiweyo

uMthunywa

Langelihle Moyo

KULENDODA yeNyathi okubikwa izibophele ngocingo egangeni ngemva kokuba itholakale ilempahla ezitshontshiweyo emzini wayo.

Kubikwa uCabangani Mabhena oleminyaka engu-23 yokuzalwa wesigabeni seNyathi esiqintini se-4B eBritwell, utholakale ezibophele ngocingo esihlahleni mhlaka 13 kuyonale inyanga.

Mhlaka 11 kuyonale inyanga izakhamizi zendawo le ezasezikhathele ngokutshontshelwa zaqoqana zaqonda emzini kaMabhena zimsola ngobusela. Ekufikeni kwazo zathola ezinye impahla ezatshontshwayo ezigoqela ingubo lezigqoko okwatholakala endlini kaMabhena eyokulala.

Intatheli kaMthunywa ibuye yezwa ukuthi mhlaka 13 ngehola lesibili emini, enye indoda yathi itheza inkuni egangeni yathi isithi mehlo suka yabona uMabhena esezihilele, wahle wayabikela amapholisa ngodaba lolu.

Isikhulumi samapholisa eMatabeleland North uInspector uGlory Banda uthe udaba lolu lufikile endlebeni zamapholisa.

“Udaba lolu lusezandleni zamapholisa, isidumbu satholakala singelamanxeba emzimbeni. “Isidumbu sahanjiswa esibhedlela seNyathi ukuze siyekwenziwa i-post moterm. Amapholisa asachwayisisa ngokugcweleyo ngodaba lolu,” kuphetha uInsp Banda.

Share This:

Sponsored Links

Survey


We value your opinion! Take a moment to complete our survey

This will close in 20 seconds