uMthunywa
Thokozile Mbedzi
ZILOKHU zibabaza zingaqedi izakhamizi zesigabeni seGuyu ngaphansi kwenduna uMathe, ngemva kokuba ijaha elileminyaka engu-22 lizibophele kuviki ephelileyo ngoba likhuzwe nguyisekazi.
UPenson Ndlovu kubikwa wakhuzwa nguyisekazi ngokungahloniphi kanye lokuthanda ukuhamba ebusuku wazonda wasesiyazihilela.
Omunye umakhelwane okhulume loMthunywa uNkosazana Sisa Ndlovu uveze ukuthi isenzo sikaPenson sokuzondela ukukhuzwa aze akhethe ukuzibulala sethuse isigaba sonke.
“Silesithuli silapha njengezakhamizi ukuthi kambe nxa abantwabethu bengasafuni ukukhuzwa yithi abazali babo bazakuba lempilo enjani.
“UPenson wakhuzwa kungoMvulo ntambama kuviki edluleyo ukuthi atshiye umkhuba wokungahloniphi lokuhamba ebusuku wahle waphuma wahamba. NgoLwesibili ntambama sathola eselenga,” kutsho uNkszn Ndlovu.
Esinye njalo isakhamuzi uMnumzana Jones Mthethwa uthe kuyadanisa ukuba ujaha lo obesakhula obelekusasa elikhanyayo uthethe impilo yakhe ngenxa yokungafuni ukukhuzwa.
“Kuyadanisa ukuba abantwana bakulezinsuku sebefuna ukwenza umathanda, kabasafuni ukuqondiswa. Sebebona angathi ukukhuzwa yikuhlutshwa.
“Okunye okubuhlungu yikuthi utshiye isibonelo esibi ngoba abanye abasakhulayo sebezabona angathi ukuzibophela yinto enhle kukanti kulihlazo,” kulandisa uMnu Mthethwa.
Imizamo yokukhulumisana lesikhulumi samapholisa esabelweni seMatabeleland South uInspector Philisani Ndebele yehlule.
