uMthunywa
Vusumuzi Ndlovu
Isihloko : The CashMere Summer EP
Umculi : KBrizzy
NGILAMUKELA njalo kwesinye isihloko soluju esilucubungula maviki onke olwakhonapha koBulawayo lendawo eziseduze leZimbabwe. Kuliviki silojaha weMahatshula owakhulela eLuveve, oseke wachaphela kweleNamibia waphenduka esephethe izicoco ezimbili. Uphinde njalo wananzwa koBulawayo ngemisebenzi yakhe ebonakala njalo izwakala lokuthinta intsha yakoMthwakazi.
UKabelo Matiwaza ubuye ngovivi ngedlalade lakhe elile ngoma ezilitshumi, uCashMere Summer EP.
Kulelidlalade, usebenze loSilolamkhonto okhulisa umdumo wakhe weSgubh’Kwela kuzonke ingoma ezimunyethweyo. Uvula ngesingeniso uShamalama edlalisa amabala, kuyikukhombisa nje ukuba engasebenzisa loba yiwuphi umutsho loba ibala aliphendule ingoma. Uxhumana loAsaph ku Running Men bekhuluma ngokushukumisa uMthwakazi ngomsebenzi wabo wamagama le ngoma. KuParty ka Nyoko ukhuza umngane wabo obuya lomgane wakhe abe sesiba yinkinga lomuntu wakhe endaweni, ngakho uyamkhuza embeka endaweni yakhe lokuthi azibambe ngoba akusi kibo(Konyoko).
UDiablo yingoma ekhuluma ngokuzijabulela labangane bakhe, uhlobo lwe ngoma luhlukile njalo lapha ucula ngesiLungu ehlanganisa lesiNtu . Indlela abeka ngayo izitsho lamagama lubonisa umuntu okhaliphileyo ngomcabango wakhe ma esejulisa imibono yakhe engomeni.
UMami Wami yingoma edibanisa umsindo we hip-hop, uhlanganiswe lweKwaito.Ukhuluma lentombazana yakhe eyikhuthaza ukuba izikholisele impilo yayo, izidlele imali yayo ngoba iyazisebenzela. uKBrizzy uthi uyathanda ukuqala amabala lemitsho emitsha emagameni akhe ngoba uhlokoza umlaleli ukuba azame ukuzwisisa imibono yakhe ezingomeni, njenga kuRicochete Machete.
Uthi yena ukusebenzisana loAsaph kuyamkhuthaza kakhulu, baphinde baxhumana ku Call Your Super Heroes.
Lapha bazikhulumela ngokuba ungababiza ma ulomcimbi olalisayo, ngoba bayazi ukuguqula isimo emcimbini. Udibana njalo loVic Jita ku ImPopping . Ekusebenzisaneni lomkandingoma wakhe uSilolamkhonto, uthi ukholisa umdumo wabo lo omutsha, ngoba ulokumkhumbuza ngesikhathi ekhula ejabulela iKwaito.
Ezinye zengoma ezikudlalade zibalisela u Imali Yami, lapho agwaba ngamandla ezithukuthu zakhe. Uphetha idlalade lomngane wakhe asuka kude laye uRockie DouB ngoNew Ambition.
Ekukhulumeni laye uKBrizzy, uyalibona idlabuzane lokucula njalo uyatsho ukuthi umsebenzi omuhle angeke uswele usekelo noma kunzima njani. Ukhuthaza ukuba kusetshenzwe gadalala ukuze kube lempumelela kwezomculo. Uthi uzaqhubeka elokhe esiphekela umculo ngohlonzi olupheleleyo, njalo ngendlela ethokozisayo. Qhubeka jaha, siyaziqhenya ngawe Diablo!!!
