uMthunywa
Nkosilathi Sibanda
UJOHNFAT Sibanda, uMgcinisihlalo omutsha weHighlanders uthe leliqembu selikhululiwe ngakho uzaliguqula lilandelwe ngumuntu wonke othanda inguqu.
USibanda osehlala engobobothekayo kulezinsuku, ubike njalo ukuthi wayekwazi ukuthi uzamgenqula uKenneth Mhlophe esihlalweni sikamgcinisihlalo weqembu leHighlanders.
Ungene ehwitha uSibanda nanko phela kubonakele ngeSonto ephiwa isihlalo sobukhokheli ngabalandeli beHighlanders.
“IHighlanders ibincindezelwe. Isikhululiwe, kutsho lumgcinisihlalo esethula umbiko wakhe wakuqala kuntatheli,” ngemva kwemizuzu sekubikwe ukunqoba kwakhe.
“Ngizasebenzela iqembu. Yisikhathi sokuthi sakhe iqembu, lilandelwe linengi labathandi bebhola. Umkhulu lumsebenzi, kumele sisebenze ngokubambana langobunono obukhulu.”
UKenneth Mhlophe wamukele umgcinisihlalo omutsha ngezandla zombili, okuyisenzo esinconywe yibhodi yeqembu labalandeli. UMhlophe utshiya isihlalo elenhlonipho yaphezulu kulandela ukukhokhela iqembu elanqoba inkezo yeChibuku Super. Ukhokhele ngesikhathi inguqu ivinjelwe ligcikwane leCovid-19 lapho iqembu elathwala nzima lidinga usizo lokunakekela impilo zabadlali ngesikhathi behlezi emakhaya.
Loba enqotshiwe, uthe ufisela uSibanda ingqubekela phambili.
“Okumqoka yikuthi iqembu liyephambili. Abantu bakhulumile, ngiyakwamukela.”
Babuye bebanengi, okungakaze kubonakale kumbali.
