uMthunywa
Nkosilathi Sibanda
OWAYENGUKAPUTENI wamaWarriors, uDanny “Deco” Phiri, uthi kulandela ukulimala edolweni, eseTanzania, lapho abelesikhathi esifitshane leqembu leDiamond Trust Bank (DTB), usedinga iqembu angalidlalela kuleli.
UPhiri, oleminyaka yoku-33 yokuzalwa wacabanga ukuthi aphenduke eZimbabwe ekuqaleni kwalumnyaka njalo wafuqwa yikuthi kasoke enelise ukudlala phandle kwelizwe ngemva kokuthi iZifa imiswe yiFifa ngenxa yokugxamukela kweSports and Recreation Commission ebholeni, osekuvimbe labadlali abanengi ukuthi bathole ithuba phetsheya.
Sports and Recreation Commission
Ekhuluma lentatheli kuliviki, umdlali lo uthe useqine saka ngakho amaqembu kumele alwisane ukumthola.
“Iqiniso elikhona yikuthi ngizingela ithimu engingayidlalela kuleli,” kutsho uPhiri owathola isicoco sokungena kukhalenda yengcitshi zabadlali kuCastle Lager ngesizini ka-2015.
“Sekwedlule amaviki ambalwa ngizilolonga.
Isifiso sami yikuthi ngiqale ukuzilolonga laloba yiphi ithimu ngenhloso yokubuyela enkundleni ngokugcweleyo.
“Ngiyajabula ukuthi sengiphendukile njalo ngiqine saka ngemva kokulimala edolweni okwenzakala ngiseTanzania.”
Iphephandaba likazulu lizwe ukuba umdlali lo ufisa ukuthi abuyele kuqembu elamkhulisayo, lamakhela udumo, ele-Chicken Inn.
Abasiki bebunda baveze ukuba iChicken Inn ifuna azosebenza njengomaneja wamaqembu ayo abafana abasakhulayo.
Ebuzwa ngalokhu, uPhiri uthe kakezwa lutho kodwa yena ufuna ukuthi alolonge layo njengomdlali.
UPhiri wasuka ku-Chicken Inn ngesizini ka-2016 esiyadlalela iGolden Arrows eSouth Africa.
Usuke kulelo esiya eTanzania.
