uMthunywa
U-PRINCE Dube usethandwa ukwedlula bonke abadlali beqembu le-Azam lase-Tanzania kulandela ukuhlohla kwakhe amabhola amathathu kumidlalo emine.
Umgadli lo, oselenyanga ezimbili eseTanzania ufike waphathwa emlonyeni yabalandeli lababukeli bebhola leligi ephakemeyo kulelo eye-Vodacom Premier League. Ngaphandle kokuhlohla, uPrince uncedise kakhulu ukunikeza abanye abadlali ukuthi balithele emambuleni.
Iqembu le-Azam okwamanje liyakhokhela kuligi le ngemiklomelo elitshumi lambili kuligi le elamaqembu ayisitshiya galombili.
Uthe ngokufika kwakhe ewathela emambuleni, uPrince unikezwe ibizo elithi “The Beast”.
Umdlali lo, loba ekhokhela ngamabhola, bakhona abamhlezi izithende okutshengisa ukuthi ibhola leTanzania lonyaka lizakhipha umncintiswano wengcitshi zokuhlohla. Ngemva kukaPrince kulabadlali abayisitshiya galolunye asebehlohle amabhola amabili munye ngamunye.
Kusele amaqembu amabili kuphela angakahlohli, iGwambina leMbeya City. I-Azam ilakho ukuthi ihluthulelwe umbuso phezulu kwelogu liqembu leSimba Stars eselihlohle amabhola alitshumi.
Ekhuluma esebulenjini ngoLwesithathu, uPrince uthe usehlalisekile ku-Azam ngakho uzadlala ukuthi aphakamise umdlalo wakhe.
“Ngifike eqenjini ngemukelwa kuhle, engibona angathi yikho okungivulela inhlanhla yokudlala kuhle,” kutsho lumdlali.
UPrince wabizwa enkundleni ze-Azam ngemali engange-$US50 000.
Ithimu le yathembisa ukuthi izancedisa ukuvulela umdlali lo amathuba okuya kwele-Europe lapho okulamaqembu alemali ezwayo.
